Dili, 16 Maiu 2025 – Estudante sira husi ensino basiku no eskola sekundaria iha Dili partisipa iha kompetisaun nasional jinastika no atletizmu nian, ne’ebé hala’o iha resintu Ministeriu Juventude, Desportu, Arte no Kultura (MJDAK) Lecidere, hanesan parte hosi festividade ba Loron Restaurasaun Independénsia Timor-Leste ba dala 23.

Atividade ida ne’e organiza husi Ministeriu Edukasaun, liu husi Direksaun Jeral Ensino Sekundariu no Tekniku-Vokasionál, hodi fó oportunidade ba estudante atu hatudu kapasidade no talento sira iha área jinastika no atletizmu.

Diretor Jeral Ensino Sekundariu no Tekniku-Vokasionál, Senhór Deolindo Cabral, hateten katak kompetisaun ne’e importante tebes atu motiva estudante sira.

“Kompetisaun ne’e fó espasu ba estudante sira atu hatudu sira-nia kapasidade no estimula motivasaun ba sira atu kontinua prepara-an ba kompetisaun iha tempu oin, mesmo ba sira ne’ebé seidauk hetan klasifikasaun,” deklara Diretor Cabral.

Iha kompetisaun jinastika, Eskola Sekundaria Jeral 12 de Novembru konsagra-an ho klasifikasaun uluk, simu prémio $500.00, tuir mai Eskola 4 de Setembru no Eskola Finantil iha posisaun segundo no terseiru.

Paralelamente, kompetisaun atletizmu 5 km ba estudante ensino basiku sentral mos akonta ho dinamika. Estudante sira husi EBS Bidau Akadiru-Hun no EBS 10 de Dezembru Comoro hetan klasifikasaun dahuluk ba mane no feto.

Atividade edukativu-desportivu sira ne’e fo kontribuisaun importante ba valorizasaun edukasaun fisika iha nivel eskolar no kontribui ba dezenvolvimentu juventude ativa iha Timor-Leste.

#MídiaMJDAK