DILI, 12 Maiu 2025 – Ministru Juventude, Desportu, Arte no Kultura (MJDAK), Nelyo Isaac Sarmento, ohin simu audiénsia husi Grupu Costa, lideradu husi Anastácio da Costa, iha ámbitu realizasaun kompetisaun nasionál Bodybuilding nian. Enkontru ne’e hala’o iha edifísiu MJDAK, Dili.

Grupu Costa informa ba Ministru kona-ba preparativu sira ba kompetisaun Bodybuilding ne’ebé planu atu realiza iha Timor Plaza iha loron 17 fulan Maiu 2025. Durante enkontru ne’e, Komisaun Organizadora apresia tebes Ministru nia disponibilidade atu rona sira-nia preokupasaun no aprezenta situasaun finanseira atual, inklui prémiu sira ba vensedór, no husu apoiu husi MJDAK.

Kompetisaun ne’e sei foka liu ba modalidade Bodybuilding, ne’ebé durante ne’e seidauk dezenvolve ho másimu iha Timor-Leste. Inisiativa ida-ne’e mós parte husi prosesu preparasaun atu harii Federasaun Bodybuilding Timor-Leste. Komisaun Organizadora daudaun ne’e iha prosesu formasaun estrutura tanba presiza organizasaun ida ne’ebé dedika espesifikamente ba modalidade desportiva refere.

“Maski iha Timor-Leste iha ona federasaun desportu nian balun, ami sente katak presiza federasaun ida ne’ebé fó prioridade liu ba promosaun Bodybuilding nian. Ami ho kolega sira, ne’ebé mós eis-atleta iha área ne’e, organiza kompetisaun ida-ne’e atu fó valór aas ba Bodybuilding. Ami iha ona esperiénsia iha kompetisaun internasionál, no agora ami halo preparativu atu formaliza Federasaun Bodybuilding Timor-Leste,” hateten Anastácio da Costa.

Nia hatutan tan katak Grupu Costa mós estabelese ona kontaktu ho federasaun internasionál no aziátika sira. Iha enkontru ne’e, sira partilla mós informasaun kona-ba planu governu nian, inklui kolaborasaun ho Prezidénsia Repúblika atu promove turizmu desportivu. Bodybuilding iha poténsia atu kontribui signifikativamente, inklui iha Festival Fronteira 2025 ne’ebé sei inklui desportu nu’udar parte importante ba promosaun kultura no turizmu.

Ministru Nelyo Isaac Sarmento hatudu disponibilidade no konsiderasaun ba proposta ne’e. MJDAK sei kontinua analiza proposta refere liuhusi kanál formál sira iha koordenasaun ho autoridade relevante sira.

#MídiaMJDAK