Díli, 8 Jullu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala’o audiénsia ho Sua Exelénsia Prezidente Repúblika, Dr. José Ramos-Horta, iha Palásiu Prezidensiál, Ai-Tarak Laran, hodi aprezenta preparasaun ba Maratona Internasionál Dili 2025 no XII Jogos Desportivu Komunidade Países de Língua Portuguesa (CPLP), ne’ebé sei akontese iha Timor-Leste iha fulan Jullu tinan ne’e.

Audiénsia importante ne’e mós partisipa husi Sua Exelénsia Vise-Primeiru Ministru no Ministru Turizmu no Ambiente, Francisco Kalbuady Lay, no representante sira husi Federasaun Atletizmu Timor-Leste (FATL).

Ministru Nelyo Isaac Sarmento hatete katak Maratona Internasionál Dili tuir planu sei hala’o iha fulan Outubru 2025, ho esperansa hetan partisipasaun atleta internasionál, inklui atleta husi rejiaun ASEAN no Timor-Leste rasik. Ekipa téknika konjunta kompostu husi Palásiu Prezidensiál, MJDAK no FATL, sei finaliza kritériu partisipasaun iha tempu ne’ebé presiza, no anúnsiu ofisiál sei halo ba públiku iha momentu apropriadu.

Iha audiénsia ne’e, Ministru aprezenta mós informasaun kona-ba preparasaun final ba Jogos CPLP 2025, ne’ebé sei loke formalmente iha loron 19 Jullu 2025 ho serimónia abertura iha Estadiu Nasionál, Díli. Jogu abertura sei involve ekipa Timor-Leste kontra Portugal iha tuku 16:00.

Prezidente Repúblika sei la partisipa iha serimónia abertura tanba sei representa Timor-Leste iha XVª Simeria Xefe Estadu no Governu CPLP, ne’ebé sei akontese iha Guiné-Bissau entre loron 16 to’o 20 Jullu 2025. Prezidente konfirma ona presensa ba serimónia enserramentu Jogos CPLP.

Ministru Nelyo reitera katak preparasaun logístiku, tékniku no protokolár iha nivel avansadu, no Timor-Leste prontu atu simu delegasaun husi Estadu-Membru CPLP sira.

Enkontru refere mós partisipa husi Prezidente FATL, Afranio Xavier, no ekipa téknika MJDAK.

#MídiaMJDAK