Dili, 25 Janeiru 2025 – Ministériu Juventude, Desportu, Arte, no Kultura (MJDAK), iha parseria ho Ajénsia Kooperasaun Internasionál Korea (KOICA), kompleta programa treinamentu futeból intensivu iha Kampu Becora, Dili.  Partisipante na’in 40, inklui mane na’in 28 no feto na’in 12, hetan formasaun durante semana ida hahu 20-25 flan janeiru tinan 2025 hodi hametin infraestrutura futeból Timor-Leste nian no haburas dezenvolvimentu juventude nian.

Programa ne'e iha sesaun loron-loron ba parte rua: treinamentu prátiku iha dadeer no klase teóriku iha loraik. Dezeña atu prepara treinadór sira ba Jogu CPLP, ida-ne'e foka ba abilidade téknika sira, komprensaun tátika, no estratéjia sira envolvimentu juventude nian.

José Monteiro, Xefe Departamentu Federasaun Desportu, dirije ba partisipante sira durante serimónia enseramentu programa nian. “Formasaun ida-ne'e la'ós de'it atu hetan sertifikadu; ida-ne'e kona-ba foti responsabilidade nu'udar líder sira iha futuru iha desportu. Treinadór sira hala’o kna’ar xave hodi hakbi’it joven sira, no hodi kontinua hasa’e ita-boot sira-nia abilidade, ita-boot sira sei kontribui ba kreximentu futeból nian iha Timor-Leste no ajuda ami kompete iha palku internasionál,” nia hateten.

Adjuntu Sekretáriu Jerál Federasaun Futeból Timor-Leste (FFTL), Fernando Xavier, subliña signifikadu atu iha treinadór sira ne’ebé treinadu ho di’ak. “Atu harii jogadór sira ne'ebé di'ak, ita presiza treinadór sira ne'ebé di'ak. Kolaborasaun entre MJDAK no KOICA ida ne’e hanesan investimentu folin ba ita nia futuru. Nu'udar partisipante sira, agora ita-boot sira iha responsabilidade atu aplika saida maka ita-boot sira aprende ona, treinu jogadór foun sira, no ajuda dezenvolve sira nia abilidade no karakter tantu iha kampu laran no iha kampu liur,” Xavier hatete.

Partisipante ida, Juvencia Xavier, hato’o agradesimentu ba oportunidade ne’ebé iha. “Ami agradese ba KOICA, FFTL, no MJDAK ne’ebé fó ona formasaun folin-boot ida ne’e mai ami. Simu sertifikadu rua – ida husi KOICA no sertifikadu treinadór Grau D – maka priviléjiu ida ne'ebé sei loke odamatan ba ami. Ami hetan ona koñesimentu kona-ba tékniku sira treinadór nian, regra sira seguransa nian, igualdade jéneru nian, nutrisaun, no tátika sira hodi dezenvolve jogadór sira no hametin futeból iha Timor-Leste.”

Partisipante sira mós destaka importánsia husi edukasaun kontinua. “Ami hein katak FFTL no MJDAK sei oferese tan programa formasaun sira, hanesan oportunidade atu avansa husi sertifikasaun Grau D ba Grau C. Ida-ne'e sei permite ami atu halo impaktu boot liu iha dezenvolvimentu futeból iha nasaun tomak,” sira hatutan.

Inisiativa ida-ne’e reflete kompromisu kontínuu MJDAK no KOICA nian hodi harii ekosistema desportu ne’ebé sustentável liuhosi hakbi’it treinadór lokál sira no prepara jerasaun talentu futeból tuirmai iha Timor-Leste.

#MédiaMjdak