Dili, 13 Janeiru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala’o enkontru estratéjiku ho komitiva KOICA hodi ko’alia kona-ba preparasaun ba entrega ofisiál infraestrutura desportu sira ne’ebé finansia hosi organizasaun ne’e.

Enkontru ne’e hetan partisipasaun husi reprezentante xave sira husi MJDAK, Diretór Jerál Servisu Kooperativa nian,Diretór Jerál Desportu nian,Diretór Nasionál Patrimóniu, Lojístika no Infraestrutura,Xefe Gabineti no Asesór sira, enkuantu KOICA hetan reprezentasaun husi: Deputy Country Diretor, Sr. Sunghwan Jang ; Country Diretor, Sra. Youn Hwa Kang no Koordenador Programa, Sr. Marcos da Costa Dias.

Tópiku Prinsipál sira enkontru nian maka kona-ba entrega ofisiál ba infraestrutura desportu sira, Asinatura ba dokumentasaun ne'e marka ona ba fulan-Fevereiru 2025 nomos atividade sira projetu nian sei remata iha Juñu 2025 ho akizisaun ba ekipamentu desportu nian. KOICA HQ (Koreia Súl) koordena hela sosa no haruka ekipamentu sira ne’ebé sei to’o no halo instalasaun iha Sentru Desportu Becora iha fulan-Marsu 2025.

 Projetu ne’e reprezenta pasu signifikativu ida hodi hametin setór desportu iha Timor-Leste, hodi promove kolaborasaun entre MJDAK no parseiru internasionál sira hanesan KOICA.

MJDAK iha nafatin komitmentu atu dezenvolve inisiativa sira ne’ebé kontribui ba progresu desportu no juventude iha rai laran.

#MédiaMjdak