DILI, 01 Jullu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, akompaña husi Diretór Jerál Desportu (DJD) João M. Rodrigues, no Xefe Gabinete MJDAK, Egas Barros Guterres Godinho, ohin hala’o reuniaun importante ida ho federasaun desportiva sira ne’ebé sei partisipa iha XII Jogu CPLP 2025. Enkontru ne’e hala’o iha Salaun Magna MJDAK, Lecidere, Díli.

Objetivu prinsipal husi reuniaun ne’e, tuir Diretór Jerál Desportu no mós Xefe Misaun ba Jogu CPLP, João M. Rodrigues, katak Timor-Leste prontu ona atu simu jogu internasionál ne’e. Enkontru ne’e foka liu ba finalizasaun preparasaun kona-ba oráriu jogu, kompetisaun, no mós oráriu ba fahe prémiu.

“Depois ita halo preparasaun atu sai uma na’in ba Jogu CPLP, ita to’o ona iha faze ikus. Nune’e liga mós ba iha preparasaun ba komisaun organizadóra no ba federasaun sira tanba atividade prinsipal liu mak jogu. Tanba ne’e mak ohin ita bolu federasaun sira mai hodi halo preparasaun ba oráriu jogu no kompetisaun, inklui oráriu oinsá fahe prémiu,” dehan João M. Rodrigues.

Nia mós informa katak iha jogu abertura, ekipa Timor-Leste sei hasoru malu ho Portugal, hanesan asuntu ida ne’ebé diskute ona ho federasaun sira.

Kona-ba partisipasaun nasaun sira, Xefe Misaun ne’e informa katak nasaun rua ne’ebé konfirmadu sei la partisipa iha eventu XII Jogu CPLP mak Brazil no Giné Ekuatoriál. Ho nune’e, nasaun hitu (7) de’it mak sei partisipa iha jogu ne’e, inklui Timor-Leste nu’udar uma na’in.

Reuniaun ne’e hetan partisipasaun husi Diretór Nasionál Federadu Oscar Dias Quintas, Prezidente Federasaun sira, ekipa téknika no komisaun organizadora ba Jogus CPLP, inklui asesor sira.

#MídiaMJDAK