Luro, Lautem, 7 Maiu 2025 – Husi kompromisu ba dezenvolvimentu juventude no promosaun dame, Ministériu Juventude, Desportu, Arte no Kultura (MJDAK) lansa jogu desportu komunitáriu iha Postu Administrativu Luro, Munisípiu Lautem, hanesan parte integrál ba selebrasaun Loron Restaurasaun Independénsia ba dala XXIII iha loron 20 Maiu 2025.

Diretor Nasionál Desportu ba Ema Hotu (Desportu Para Todos), Egas Freitas de Rossa, reprezenta Sua Exelénsia Ministru Nelyo Isaac Sarmento iha serimónia abertura ofisiál. Atividade ne’e hetan apoiu diretu husi MJDAK ho total fundu $3,500.00 USD, atu sustenta kompetisaun iha modalidade Voleibol, Kalik, Dada Tali, Halai 100 metrus no jogu tradisionál seluk, ne’ebé hala’o iha kampu Voleibol Parókia Luro.

Diretor Egas hateten katak inisiativa ne’e fó oportunidade ba juventude iha nivel postu atu envolve iha jogu desportivu komunitáriu hanesan kontribuisaun ba selebrasaun nasional. Iha tinan ne’e, 40 Postu Administrativu iha Timor-Leste sei hetan oportunidade hanesan. 

“Ita hakarak kria ambiente dame, hametin amizade iha komunidade, fó espasu ba juventude atu exprésa talentu no estimula moris saudável. Jogu ne’e bele mós sai plataforma preparasaun ba ekipa forte iha nivel munisípiu no nasionál,” hateten Diretor Egas.

Nia fó mós apelu ba lider komunitáriu sira atu fó atensaun ba labarik ho idade 16 ba kraik, atu envolvese iha treinu, liuliu modalidade Voleibol, ho esperansa atu sai jogadór talentozu iha futuru.

Autoridade Postu Administrativu Luro, Gaspar Xavier, hato’o agradesimentu ba MJDAK no subliña katak jogu ne’e sei sai espasu aprendizado ba valor kompetisaun, disiplina no unidade. “Tenke hadomi no respeita malu – manán ka lakon – no hametin patriotizmu atu fó kontribuisaun ba Timor-Leste,” hateten nia.

Ekipa Partisipante: Feto (8 Ekipa) ; Luro, Kotamuto A, Baricafa, Afabubo, ADM.Luro, Esl.Lacawa, Kotamuto B no Afabubo B.  Mane (12 Ekipa): ADM.Luro, Luro A, Esl.Lacawa, Baricafa A, Baricafa B, Afabubo A, Afabubo B, Kotamuto, Kotamuto B, Lacawa, Afabubo B, Wairoque no Luro B.

Atividade lansamentu ne’e hetan partisipasaun entuziástika husi Referendismu Amu Parókia Luro, Autoridade Postu, PNTL, Xefe Suku sira no komunidade Luro tomak.

#MídiaMJDAK