Likisá, 3 Maiu 2025 – Ministériu Juventude, Desportu, Arte no Kultura (MJDAK), liuhosi Xefe Gabinete Egas Barros Guterres Godinho, hamutuk ho Sua Exelénsia Ministru  Ensinu Superior, Siénsia no Kultura, José Honório da Costa Pereira Jerónimo, ofisialmente loke kompetisaun Kopa RIZARA 2025 iha Munisípiu Likisá.

Kopa RIZARA 2025 sai hanesan festa desportiva boot ba komunidade Likisá, tanba tinan barak kompetisaun hanesan ne’e la realiza. Kompañia RIZARA Unipessoal Lda ho familia tomak fó kontribuisaun ne'ebé importante, maski hasoru dezafiu oioin, hodi mantein no fila hikas inisiativa ba realidade.

Iha diskursu serimónia abertura, Sua Exelénsia Ministru José Honório hateten katak desportu presiza apoiu tanba bele harii esperansa ba juventude atu deskobre no hatudu talentu. Nia subliña katak desportu la'ós espasu atu tebe malu, maibé plataforma atu tebe bola ho espírito unidu no fraternidade. Nia fó hanoin kona-ba jogador famozu husi Brasil, Ronaldinho, ne'ebé mai husi área remota, maibé bele atinje mundu internasionál. Nune’e mós nia esperansa atu haree jogadór famozu sai husi Likisá iha futuru.

Sekretáriu Jerál Federasaun Futebol Timor-Leste (FFTL), Adilson Ribeiro, fó parabéns ba Asosiasaun Futebol Likisá ho kooperasaun profisionál ho Kompañia RIZARA. Nia hateten jogu ida ne’e envolve klubu barak ho organizasaun diak, ne’ebé fó esperansa atu kontínua dezenvolve futeból iha nivel munisípiu. Nia hatudu apresiasaun tanba kompania ida hanesan RIZARA bele investe iha área desportu, ne’ebé iha Timor-Leste ainda susar atu hetan patrosinador hanesan ne’e.

Kopa RIZARA 2025 envolve 28 ekipa futeból. Jogu abertura halo entre klubu Ain Tahu FC kontra Kasaít FC, no kompetisaun sei kontinua to'o loron 20 Maiu 2025. Tema kopa nee: “Hametin Paixão no Fraternidade Futebol Munisípiu Likisá”.

Patrosinador prinsipal, Kompañia RIZARA Unipessoal Lda, hamutuk ho família tomak, fó inspirasaun ba juventude Likisá atu kontinua bele hetan motivasaun no oportunidade liuhosi futeból hanesan meiu unidade no dezenvolvimentu komunidade.

#MediaMJDAK