Dili, 14 maiu 2025 – Ministru Juventude, Desportu, Arte no Kultura, Nélio Isaac Sarmento, partisipa ativu iha reuniaun periódika Konsellu Ministru, ne’ebé hala’o iha Palásiu Governu, iha Dili. Sesaun ne’e prezide husi Primeiru-Ministru Sua Exelénsia Kay Rala Xanana Gusmão.

Durante enkontru ne’e, Konsellu Ministrus dirije aprezentasaun introdusaun kona-ba Polítika no Planu Asaun ba Ekonomia Azul 2025–2030. Diskusaun ne’e foka liu ba promove ekosistema tasi ne’ebé reziliente no sustentavel iha Timor-Leste. Estratéjia inovadora ida-ne’e propoin paradigma foun ba dezenvolvimentu ekonómiku, ne’ebé bazeia ba iha utilizasaun responsável rekursu tasi nian, ho objetivu atu hadi’a kondisaun moris komunidade sira-nian no prezervasaun ambientál.

Planu ne’e sei hala’o liuhusi polítika integrada, foka liu ba domíniu marítimu no nia interligasaun ho dezenvolvimentu sosioekonómiku no ambientál, ho forma diversifikada, inkluziva no sustentável. Durante faze elaborasaun nian, sei organiza konsulta públika luan, ne’ebé envolve munisípiu sira, organizasaun naun-governamentál sira no parseiru dezenvolvimentu sira, ho objetivu atu halibur input no garante partisipasaun hosi setór relevante hotu-hotu.

Ministru Nélio Isaac Sarmento mós akompaña didi’ak prosesu orientasaun estratéjiku ne’ebé importante tebes, ne’ebé sei fó impaktu diretu ba juventude no komunidade tasi-ibun sira, hodi reprezenta lian ativu ida ba sustentabilidade nasionál iha futuru.

Iha parte finál sesaun ne’e, Konsellu Ministru aprova projetu Dekretu Governu ne’ebé revoga Dekretu Governu Nú 25/2021. Medida ne’e ho objetivu atu halakon tiha Unidade Misaun ba Jestaun Integradu Projetu Aeroportu Internasionál Prezidente Nicolau Lobato (UMGIP), tanba unidade ne’e nunka instala ka dezenvolve atividade ruma.

Asaun ida-ne'e mosu hodi hatán ba aprovasaun foin lalais ne'e ba konseitu foun ba projetu aeroportu nian (7 Maiu 2025), ho intensaun atu garante jestaun ne'ebé áxil liu, efetivu no efisiente.

Timor-Leste hakat ba dezenvolvimentu ne’ebé inkluzivu no sustentável –  ho juventude, arte, kultura no desportu hala’o papél sentrál iha prosesu dinámiku ida ne’e.

Fonte: Komunikadu Imprensa Governu Timor-Leste