Dili, 14 Janeiru 2025 - Ohin, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ho Sekretáriu Estadu Arte no Kultura (SEAK), Jorge Soares Cristovão, lidera enkontru importante ida ho Konsellu Diretores.

Enkontru ne'e foka ba avaliasaun dezempeñu anuál 2024 nian, hodi analiza progresu ba meta sira no utilizasaun efisiente rekursu sira nian. Aleinde ida-ne'e, diskute kona-ba planeamentu estratéjiku ba tinan 2025, hodi buka atu hadi'a kualidade no impaktu hosi servisu sira ne'ebé fornese hosi Ministériu.

Tuir Ministru Nelyo Sarmento "Avaliasaun ne'e krusiál ba ami atu ajusta ami nia foku no garante katak orsamentu no atividade sira Ministériu nian iha 2025 kumpre nesesidade no meta sira ne'ebé estabelese ona."

Xefe gabinete sira, diretór jerál sira, diretór nasionál sira no xefe departamentu sira partisipa iha enkontru ne'e, hodi hametin kompromisu ba futuru ida ne'ebé promisór ba setór juventude, desportu, arte no kultura.

#MédiaMjdak