DÍLI, 12 Juñu 2025 – Diretór Nasionál Patrimóniu, Lojístika no Infraestrutura (DNPLI) husi Ministériu Juventude, Desportu, Arte no Kultura (MJDAK), Abel de Jesus Andrade, akompaña husi Xefe Departamentu Lojístika no Manutensaun, Rafael Cristian Exposto, ohin hala'o enkontru ho kompañia sira ne'ebé responsavel ba servisu lojístika MJDAK iha nível nasionál no munisípiu. Atividade ne'e hala'o iha salaun Ema ho Difisiénsia MJDAK, Lecidere, Díli.

Tuir Diretór Nasionál DNPLI, Abel de Jesus Andrade, objetivu husi enkontru ne'e maka atu bolu atensaun ba kompañia sira-nia servisu lojístika ne'ebé fornese ba Ministériu no mós ba munisípiu, hodi diskuti hamutuk kona-ba dezafiu sira ne'ebé sira hasoru. "Ohin, ita realiza enkontru ida ho kompañia sira ne'ebé responsavel ba servisu lojístika iha nasionál no munisípiu, hodi bolu atensaun ba sira-nia servisu atu bele diskuti hamutuk failansu saida mak sira hasoru iha terenu durante ne'e, atu nune'e ba oin bele hadi'a no halo di'ak liután," dehan Abel de Jesus Andrade.

Diretór Nasionál ne'e mós reforsa dezafiu balun ne'ebé kompañia sira hato'o, hanesan problema iha Estadiu Gleno, Ermera, ne'ebé mákina bomba bee aat, no kaza de bainu mós aat, ne'ebé afeta fornese bee ba sanitáriu sira. Parte Governu nota ona kestaun sira ne'e no sei hadi'a. DNPLI husu nafatin kompañia sira-nia kooperasaun hodi servisu hamutuk ho Governu atu bele dezenvolve Timor-Leste ba oin.

Servisu lojístika ne'ebé kompañia sira responsavel inklui manutensaun Air Condition (AC), seguransa husi kompañia Gardamór ba kampu futeból akadémia Becora, ekipamentu lojístika ba estádiu Ermera no Baucau, fornese kombustivel ba Ministériu, no mós servisu cleaning (hamos) husi kompañia Labilay. Enkontru ne'e partisipa husi Diretór Kompañia sira, hamutuk ho Manajer no Supervisor sira.

#MídiaMJDAK