DILI, 17 Fevereiru 2025 – Sekretáriu Estadu Arte no Kultura (SEAK), Sua Exelénsia Jorge Soares Cristovão, nu'udar Koordenadór Jerál, ohin lidera enkontru ida ho reprezentante federasaun desportiva sira. Reuniaun ne'e halo atu diskute preparasaun atleta nasionál sira nian ba Jogos Comunidade dos Países de Língua Portuguesa (CPLP) 2025. Enkontru ne'e hala'o iha Salaun Magna Ministériu Juventude, Desportu, Arte no Kultura (MJDAK), Lecidere, Díli.

Partisipa mós iha enkontru ne'e kargu dirijente sira husi MJDAK, hanesan Diretór Jerál, Diretór Nasionál, Xefe Gabinete, Asesór sira, Xefe Departamentu sira, inklui funsionáriu sira. Husi parte relevante federasaun desportiva sira, prezente mak FETTIL, CPNTL, FXTL, FFTL, FBNTL, XADREZ, TAEKWONDO, ATLETISMO, FEKATIL, no federasaun sira seluk, hamutuk ho atleta sira.

Iha nia intervensaun, SEAK Jorge Soares Cristovão subliña katak ne'e mak Komisaun Organizadora nia enkontru dahuluk nu'udar Koordenadór Jerál ba preparasaun Jogos CPLP ho federasaun hotu-hotu. Nia hateten katak diskusaun ne'e sentru ba oinsá prepara atleta sira ba eventu ida-ne'e, rekoñesendu katak preparasaun la'ós de'it responsabilidade Governu nian, maibé mós responsabilidade federasaun sira nian. "Nu'udar uma-na'in, pelumenus ita mós bele halo buat ruma husi modalidade sia (9) ne'ebé iha. Pelumenus ita mós bele hetan netik buat ruma atu hatudu katak Timor mós bele, la'ós organiza de'it maibé hetan prémiu ruma husi modalidade sira ne'e," nia afirma.

Sua Exelénsia Jorge Soares mós informa katak koordenasaun téknika ho federasaun sira la'o hela. "Ami hakarak rona direita husi federasaun sira buat ne'ebé sira prepara no sira-nia preokupasaun sira, nune'e bele rejista hotu. Tanba, hela fulan balun de'it ona ba ita-nia preparasaun," nia esplika. Tuir kalendáriu ne'ebé iha, iha fulan Abril atleta hotu sei ba teste, hamutuk ho ofisiál no tékniku sira, total Timor-Leste sei haruka kontinjente hamutuk 101 ema.

Kona-ba preparasaun fatin sira atu realiza eventu, SEAK Jorge Cristovão hateten katak ADN mak responsavel ba ida-ne'e liu husi fundu infraestrutura. Nia espera katak kompañia sira ne'ebé iha responsabilidade sei hadia fatin sira ne'e husi fulan ida-ne'e nia laran to'o inísiu fulan Jullu, hodi Komisaun Organizadora bele simu ona fasilidade hotu-hotu. "Ita dehan katak Gináziu agora rehabilitasaun la'o hela. Ita preokupa boot maka ita-nia Estadiu Munisipál Díli tanba ita sei hala'o eventu boot iha ne'eba, maibé iha tempu badak nia laran ita-nia kompañia ne'ebé toma konta ba ida-ne'e sei finaliza," nia dehan.

#MídiaMJDAK