DÍLI, 12 Juñu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin hala'o reuniaun importante ida ho Sua Exelénsia Ministru Planeamentu, Investimentu no Estratéjiku (MPIE), Sr. Gastão Francisco de Sousa. Iha reuniaun ne'e, partisipa mós Prezidente Federasaun Futebol Timor-Leste (FFTL), Sr. Nilton T. Gusmão, akompaña husi Sekretáriu Jerál FFTL, Sr. José Adilson Ribeiro, Adjuntu Sekretáriu Jerál FFTL, Sr. Fernando Baptista Xavier, no Diretór Departamentu Dezenvolvimentu no Parseria Internasionál FFTL, Sr. Jánio Tilman. Reuniaun ne'e realiza iha salaun VIP, Gabinete MPIE nian, Fatuhada, Díli.

Sorumutu ne'e sentra ba diskusaun kona-ba prosesu tékniku atu implementa reabilitasaun ba Estádiu Munisipál Díli no konstrusaun foun ba Estádiu ho kampu futsal indoor padraun internasionál iha Tasi-Tolu, Díli.

Iha reuniaun ne'e, konsege hetan rezultadu pozitivu ida kona-ba oinsá atu hala'o prosesu implementasaun ba projetu sira ne'e. Prosesu ida-ne'e bazeia ba proposta husi FFTL atu rehabilita Estádiu Munisipál Díli no halo konstrusaun foun ba Estádiu ho kampu futsal indoor, ne'ebé hetan ona aprovasaun husi Governu Timor-Leste liuhusi reuniaun Konsellu Ministru, ne'ebé lidera direita husi Sua Exelénsia Primeiru Ministru, Kay Rala Xanana Gusmão, iha loron 04 Juñu 2025.

#MídiaMjdak