DILI, 04 juñu 2025 – Iha reuniaun Konsellu Ministru ne’ebé hala’o ohin iha Palásiu Governu, Dili, ho partisipasaun husi Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, diskute desizaun importante kona-ba futuru infraestrutura nasionál futeból nian. Konsellu Ministru aprova asina nota entendimentu rua entre MJDAK ho Federasaun Futeból Timor-Leste (FFTL).

Proposta hirak ne’e, ne’ebé aprezenta hosi Prezidente FFTL, Nilton Gusmão, halo parte iha parseria estratéjika ne’ebé ho objetivu atu hametin no moderniza instalasaun futeból nian iha nasaun.

Memorandu entendimentu dahuluk prevee kona-ba konsesaun Estádiu Sidade Dili ba Federasaun Futeból Timor-Leste ba períodu tinan 25 nia laran. Objetivu prinsipál hosi konsesaun ne’e maka atu permite FFTL atu halo reabilitasaun no hadi’a infraestrutura ne’ebé iha ona iha estádiu ne’e, hodi uza fundu hosi FIFA.

Nune’e mós, nota entendimentu daruak estabelese parseria ba futuru dezenvolvimentu infraestrutura futeból nian. Ne’e inklui dezeñu, konstrusaun, dezenvolvimentu, jestaun no manutensaun ba estádiu futeból foun ne’ebé sei harii iha sidade Dili.

Desizaun Konsellu Ministru reflete kompromisu Governu no Ministériu Juventude, Desportu, Arte no Kultura atu dezenvolve desportu nasionál, partikularmente futeból, liuhosi investimentu iha infraestrutura modernu no sustentável. Hein katak parseria ida ne’e sei fó kontribuisaun signifikativu ba Timor-Leste nia kapasidade atu sai uma-na’in ba eventu desportivu boot sira, hodi hakiak dezenvolvimentu talentu atlétiku no promove futeból iha nível nasionál no internasionál.

#MídiaMJDAK