Covalima, 31 Janeiru 2025 – Iha pasu signifikativu ida hodi prezerva no promove patrimóniu kulturál Timor-Leste nian ne’ebé riku, Sekretáriu Estadu Arte no Kultura (SEAK), Sua Exelénsia Jorge Soares Cristovão, hamutuk ho Amy Nishtha Satyam nudar Xefi UN Woman iha Timor-Leste hasoru malu ho Autoridade Munisípiu Covalima hodi ko’alia kona-ba dezenvolvimentu rede soru Taís nian iha Suai Loro.
Iha sorumutu ne’e, Administrasaun Munisípiu Covalima entrega simbolikamente Edifísiu Rede Soru Taís ba SEAK. Ida-ne'e marka ida hodi hametin kooperasaun ho komunidade soru lokál sira no harii fundasaun ba sentru rede soru no loja artezanatu sira iha futuru. Inisiativa ne'e hakarak atu kapasita soru tradisionál sira, prezerva artezanatu indíjena, no kria oportunidade ekonómika sustentável ba feto sira iha rejiaun.
Projetu, ne’ebé sei hetan apoiu hosi UN-WOMEN no ninia parseiru sira, subliña kompromisu fahe ida atu haburas empreendedorizmu kulturál no garante katak Taís—patrimóniu kulturál rekoñesidu hosi UNESCO—kontinua buras ba jerasaun sira tuirmai.
#MédiaMjdak
