MANATUTO, 24 MAIU 2025 – Liga Futeból Timor-Leste Epoka 2025 ohin hahú ofisialmente ona iha Estadiu Manatuto, marka momentu signifikante ida ba mundu desportu nasionál iha Timor-Leste. Serimónia abertura ne'e partisipa husi autoridade boot sira no figura desportiva sira, hodi sasin jogu dahuluk iha kampionatu ne'ebé ema barak hein.

Prezensa espesiál iha abertura ne'e inklui Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, no mós Sua Exelénsia Sekretáriu Estadu Arte no Kultura (SEAK), Jorge Soares Cristovão. Sira hamutuk ho autoridade Munisípiu Manatuto no Prezidente Liga Futebol Timor-Leste (LFTL), hodi fó sasin ba konfrontasaun entre klubu A.D. SLB no Karketu Dili FC.

Karketu Dili FC Lidera ona Klasifikasaun ho Pontu Perdana Iha jogu abertura ne'ebé nakonu ho emosaun, Karketu Dili FC konsege manan A.D. SLB ho skor mihis 1-0. Vitória ida-ne'e fó pontu tolu dahuluk ba Karketu Dili FC iha Epoka 2025, hodi koloka sira iha pozisaun inisiál ne'ebé di'ak iha klasifikasaun.

Kondisaun Estadiu Manatuto Prontu ba Uzu

Iha diskursu abertura nian, Ministru Nelyo Isaac Sarmento (NIS) fó apresiasaun ba kondisaun Estadiu Manatuto nian, ne'ebé konsidera ona prontu ba uza, maski ninia inagurasaun ofisiál sei adia ba fulan Juñu 2025, tuir desizaun husi Fundu Infraestrutura (CAFI). "Kondisaun kampu futebol Manatuto nian di'ak tebes, ne'ebé permite ita atu realiza jogu dahuluk iha ne'e ohin, maski seidauk inagura ofisialmente. Estadiu ida-ne'e sei sai fatin ba jogu barak iha futuru," afirma Ministru Nelyo Isaac. Ministru mós reafirma kompromisu governu nian atu kontinua apoia dezenvolvimentu futebol ba munisípiu hotu, inklui suporta finanseiru no infraestrutura.

Importánsia Regras no Regulamentu

Ministru Nelyo Isaac Sarmento (NIS) mós subliña importánsia ba klubu hotu-hotu, husi Divizaun I to'o Divizaun II, atu kumpri regras no regulamentu hotu-hotu ne'ebé Federasaun Futebol Timor-Leste (FFTL) estabelese. "Kumpri regras mak xave atu lori dezenvolvimentu futebol ba oin, kria responsabilidade iha jogu, no forma jerasaun futebolista ba futuru," nia hateten. Prezensa treinadór selesaun nasionál iha eventu ne'e mós hetan apresiasaun, nu'udar oportunidade atu identifika talentu foun ba selesaun nasionál hodi kompete iha eventu internasionál sira.

Antusiasmu husi Prezidente LFTL no Otoridade Lokál

Prezidente LFTL, Hipólito Soares, hatudu ninia orgullu ba realizasaun abertura liga iha Munisípiu Manatuto. Nia hato'o agradesimentu ba Prezidente Autoridade Munisípiu Manatuto ne'ebé oferese estadiu ba eventu importante ne'e, no mós fó sorte di'ak ba klubu rua ne'ebé hasoru malu. Prezidente Autoridade Munisípiu Manatuto mós enkoraja futebolista sira atu hamutuk lori futebolista di'ak hodi hamorin Timor-Leste nia naran iha eventu internasionál sira.

Orario Jogu Primeiru Jornada: Jornada dahuluk Liga Futebol Amadora Epoka 2025 sei kontinua iha tuku 16:00 lorokraik iha Domingu, 25 Maiu 2025, ho jogu rua ne'ebé interese:

• DIT FC sei hasoru Emmanuel FC iha Estadiu Munisipál Manatuto.
• Iha Estadiu Gleno, Ermera, AS. Ponta-Leste sei kontra Coração FC.

Povu Timor-Leste hotu-hotu konvida atu kontinua apoia kampionatu ne'e no sasin ba talentu di'ak sira iha futebol nasionál.

#MídiaMJDAK