Díli, 28 Fevereiru 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, simu vizita husi delegasaun Komisaun Téknika Akompañamentu (CTA) iha enkontru estratéjiku ida hodi diskute rekomendasaun no preokupasaun sira kona-bá preparasaun Jogu CPLP 2025. Delegasaun CTA ne’e lidera husi Koordenadór Jerál Jogu CPLP, ne’ebé mós nu’udar Sekretáriu Estadu ba Arte no Kultura (SEAK), Sua Exelénsia Jorge Soares Cristóvão. Enkontru ne’e akontese iha Salaun Magna MJDAK, Lecidere, Díli.

Enkontru ne’e lidera diretamente husi Ministru MJDAK, Nelyo Isaac Sarmento (NIS), no partisipa mós husi Sekretáriu Estadu ba Arte no Kultura, Jorge Soares Cristóvão, Diretór Jerál Desportu, João M. Rodrigues, Xefe Kabinete, Egas Barros Guteres Godinho, Inspektór Jerál GIA, João dos Santos, no reprezentante CTA sira, inklui António Manuel da Luz, Jorge César Vilela de Carvalho, Carla Alexandra Bastos da Silva, no Paulo Jorge Coimbra Fontes.

Komitmen Governu atu Suporta Jogu CPLP 2025

Iha okaziaun ida-ne’e, Ministru Nelyo Isaac hateten katak Governu Timor-Leste aprezia rekomendasaun ne’ebé CTA fornese no subliña katak dezafiu sira ne’ebé sei iha sei resolve liuhosi koordenasaun entre ministériu sira antes Jogu CPLP 2025 hahú.

“Ha’u aprezia tebes rekomendasaun importante ne’ebé CTA fornese ona. Governu sei asegura katak dezafiu hotu-hotu bele resolve liuhosi koordenasaun entre ministériu relevante sira. Komisaun organizadora lokal sei kontinua ho koordenasaun ho CTA hodi fornese informasaun atualizadu kona-bá preparasaun Jogu CPLP no ajenda seluk ne’ebé sei akontese durante kompetisaun,” hateten Ministru NIS.

Ho enkontru ida-ne’e, Governu Timor-Leste ho CTA espera katak Jogu CPLP 2025 sei la’o ho susesu no sai momentu importante ba dezenvolvimentu desportu iha nasaun membru CPLP sira.

#MediaMjdak