Dili, 4 Fevereiru 2025 – Ministru Juventude, Desportu, Arte no Kultura (MJDAK), Sua Excelénsia Nelyo Isaac Sarmento (NIS), hamutuk ho Federasaun Atletízmu Timor-Leste deside atu organiza Kampionatu Nasionál Atletízmu ba atleta U16 no Seniór iha fulan Abril 2025. Kampionatu ne’e sai hanesan preparasaun importante ba atleta sira atu partisipa iha Jogu CPLP no Sea Games 2025.

Enkontru ne’e hala’o iha Salaun Magna MJDAK, Lecidere, Dili, ho partisipasaun husi Ministru MJDAK, Diretór Jerál Desportu João M. Rodrigues, no Prezidenti Federasaun Atletízmu Timor-Leste, Afrânio Xavier. Diskusaun fó énfase ba relatóriu federasaun nian no planu atividade ba tinan 2025.

Presidente Federasaun Atletízmu, Afrânio Xavier, esplika katak kampionatu ne’e fó prioridade ba atleta juvenil U16 no seniór sira. “Ami planu atu hala’o Kampionatu Nasionál iha Munisípiu Ermera iha inísiu Fulan Abril. Objetivu mak atu selesaun atleta U16 hodi forma ekipa nasionál ba Jogu CPLP no identifika atleta seniór ne’ebé prontu ba Sea Games 2025 iha Bangkok,” hateten nia.

Nia mós dehan katak atleta selesionadu sei hetan oportunidade atu partisipa iha kompetisaun internasionál hanesan Try Out iha Korea do Sul (Maio 2025) no Japaun (Setembru 2025). “Ne’e sai hanesan dalan ida atu prepara atleta sira hodi reprezenta Timor-Leste ho di’ak iha nivel internasionál,” dehan Afrânio Xavier.

Sua Excelénsia Ministru Nelyo subliña impaktu kampionatu ida ne’e ba futuru desportu iha Timor-Leste. “Ne’e parte husi preparasaun atleta sira ba Jogu CPLP no Sea Games. Ami fó prioridade ba atleta ne’ebé pronto no kompetitivu atu halo representasaun nasaun ho di’ak,” hateten Ministru NIS.

Enkontru ne’e mós hetan partisipasaun husi Diretór Nasionál Desportu Federadu (DNDF), Oscar Dias Quintas, Xefi Departamentu Alta Kompetisaun, Josefina Jeca Pinto, no asesór sira husi Federasaun Atletízmu Timor-Leste.