Dili, 03 Fevereiru 2025 - Sua Exelénsia Ministru Juventude, Desportu, Arte, no Kultura (MJDAK), Nelyo Isaac Sarmento (NIS), hateten katak dezde inísiu Janeiru 2025, Ministériu foti ona pasu signifikativu sira. Oras ne’e dadaun prosesu implementasaun programa ne’ebe iha lao ho diak. Ministru NIS subliña katak tane aas dixiplina iha atividade hotu-hotu ne'ebé sei hala'o maka buat ne'ebé importante liu.

“Funsionáriu hotu-hotu presiza hatudu dixiplina iha sira nia atividade serbisu, dixiplina ba programa sira ne'ebé sei implementa, no foka ba implementasaun programa. “Asuntu tolu ne’e presiza halo sinkronizasaun di’ak”, tenik Ministru NIS. 

NIS hatutan, karik prezensa menus, tarde, ka implementasaun atividade sira prolongadu, sei fó impaktu negativu ba rezultadu ne’ebé hetan. “Karik prezensa menus ka tarde, entaun implementasaun atividade ne’ebé presiza oras ida bele hanaruk tan ba oras tolu ka haat, ne’ebé fó impaktu direta ba efikásia servisu,” esplika NIS iha serimónia isar bandeira nasionál, segunda-feira ne’e,iha resintu. MJDAK Lecidere, Dili.

Ministru NIS mós hateten  iha eventu boot ida ne’ebé sei akontese iha Timor Leste, hanesan Jogu CPLP 2025, ne’ebé presiza preparasaun kle’an ho disiplina no responsável hodi bele la’o ho susesu. “Ita hotu tenki hatudu disiplina no halo tuir ordem ne’ebe fo, hodi kompleta servisu tuir tempu,” dehan NIS.

NIS mós husu ba diretór sira no ekipa tomak atu hatudu disiplina hahú husi nível diretór to’o funsionáriu sira iha diresaun hotu-hotu. “Disiplina ida ne’e tenke hahu husi nai ulun sira, atu nune’e ita nia instituisaun bele hetan susesu,” dehan Ministru NIS.

Ministru NIS taka ho mensajen pozitivu ba koordenasaun no komunikasaun ne’ebé di’ak iha Ministériu, nune’e lori susesu iha futuru. "Ho koordenasaun no komunikasaun ne'ebé di'ak, ita bele garante katak eventu boot sira hanesan Jogu CPLP 2025 sei la'o ho susesu," konklui NIS.

#MédiaMjdak