DILI, 07 Jullu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, husu ba funsionáriu públiku no kargu xefia hotu iha MJDAK atu asume responsabilidade nu’udar "na’in" ba atividade XII Jogu CPLP 2025. Apelu ne’e hato’o iha serimónia Izar Bandeira fulan Jullu nian, ne’ebé hala’o iha resintu MJDAK Lecidere, Díli.

Iha ninia diskursu, Ministru Nelyo Isaac Sarmento subliña katak fulan Jullu hanesan períodu kruziál ba MJDAK. “Fulan ida ne’e, fulan kruziál ba MJDAK, tanba Timor-Leste sai uma na’in ba XII Jogu Desportiva CPLP 2025 nian, maibé iha tempu hanesan, ita mós tenke prepara ita nia orsamentu ba tinan 2026 nian,” hateten Ministru.

Nia esplika katak servisu ne’ebé halo iha fulan ida ne’e sei determina sustentabilidade programa sira ba tinan 2026. Ministru realsa importánsia husi preparasaun orsamentál di’ak, tanba se la’e, bele iha konsekuénsia ne’ebé la di’ak. “Ita iha sofrementu ba orsamentu nian, atu dehan katak ita boot sira nia servisu, sei termina katak ita bele hetan orsamentu ne’ebé di’ak. Bainhira ita la hetan orsamentu ne’ebé di’ak, iha konsekuénsia barak, balun sei deskansa iha uma ou balun karik ba buka servisu seluk,” nia dehan ho klaru.

Governante ne’e mós husu ba kargu xefia sira atu, iha faze elaborasaun, mai ho ideia no razaun ne’ebé fundamentu hodi bele implementa ho di’ak iha ministériu. Nia dehan, maski ministériu iha programa di’ak, presiza mós ema atu halo servisu. Hahú agora, kargu xefia sira tenke identifika prioridade no nesesidade ne’ebé bele ajuda ministériu, atu nune’e bele iha razaun ne’ebé di’ak.

Ministru Nelyo Isaac Sarmento mós enkoraja funsionáriu hotu-hotu atu partisipa ativamente iha atividade Jogu CPLP, la presiza haree ba ema ne’ebé tama iha komisaun ka la’e. “Bainhira sente an hanesan funsionáriu ministériu ida ne’e, maka Ita sai na’in ba Jogu CPLP ne’e. Hotu-hotu iha obrigasaun ba atividade ida ne’e atu sai na’in no fó susesu ba programa ida ne’e,” afirma Ministru.

Ikusliu, Ministru Nelyo Isaac Sarmento deseja "Bom Traballu" ba funsionáriu hotu-hotu, hodi subliña katak servisu ho responsabilidade de’it mak bele garante futuru ida ne’ebé di’ak iha ministériu no ba nasaun.

#MídiaMJDAK