Díli, 14 Fevereiru 2025 – Sua Exelénsia Primeiru Ministru Kay Rala Xanana Gusmão apela ba juventude Timor-Leste atu hadomi independénsia morál, fiar ba-an rasik, no harii karakter forte iha moris loloos nian.Mensajen ne’e nia fó bainhira hala’o diskursu iha diskusaun interativa kona-ba kolaborasaun entre Embaxadór Foin-sa’e ho Plan Internasionál, ne’ebé realiza iha Xanana Reading Room, Lecidere, Díli.

Diskusaun ida ne’e fó oportunidade ba Primeiru Ministru atu hato’o motivasaun direta ba joven sira, ho baze iha esperiénsia moris rasik.

“Ha’u aprende husi moris mesak, iha momentu ne’ebé tenki enfrenta problema rasik. Ne’e mak fó forsa atu harii karakter forte. La bele depende de’it ba ema seluk. Joventude tenki fiar ba-an rasik iha situasaun oin-oin,” hateten Primeiru Ministru Xanana.

Nia subliña katak embaxadór foin-sa’e sira iha responsabilidade atu servi nudar modelo ba jerasaun foun.

“Embaxadór la de’it atu buka naran di’ak. Iha momentu ne’ebé ita bele fó buat ida ba ema ne’ebé presiza, ne’e mak nune’e ita mostra solidariedade umana,” nia dehan.

Primeiru Ministru mós partilla hanoin kona-ba programa Embaxadór Plan Internasionál ba tinan tolu, ho objetivu atu eduka joven sira ho mentalidade no karakter.

“Governu la prepara de’it ministru sira. Governu hakarak eduka jerasaun ho hanoin livre, konsiente, no sensível ba problema morál sira iha komunidade, hanesan feto klosan no mane klosan,” hateten Xanana Gusmão.

Iha diskusaun ne’e, nia hato’o mós hanorin kona-ba liberdade no karakter nudar fundasaun importante iha dezenvolvimentu lideransa.

“Edukasaun la de’it kona-ba matenek, maibé mós liberdade hanoin no karakter forte, ne’ebé embaxadór sira bele ajuda hodi harii iha joven sira,” nia konklui.

Diskusaun ne’e hetan partisipasaun husi: Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, Reprezentante Plan Internasionál, INNDICA, UNTL, Estudante no staff organizador sira.

Atividade ne’e kontribui ba programa governu atu empodera juventude Timor-Leste liuhusi edukasaun karakter no lideransa sosial.

#MídiaMJDAK