Díli, 30 Juñu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento partisipa iha reuniaun eztraordinária Konsellu Ministru (KM), ne’ebé hala’o iha Palásiu Governu, Díli, hodi aprova Deklarasaun Estratéjia Orsamentál no tétu indikativu despeza ba Orsamentu Jerál Estadu (OJE) 2026.

Instrumentu sira ne’e – ne’ebé prevee iha Lei Enkuadramentu OJE no Jestaun Finanseira Públika (Lei n.º 3/2025, 23 Abríl) – sei sai orientasaun ba polítika fiskál iha médiu prazu. Objetivu mak atu garante koerénsia entre planeamentu dezenvolvimentu nasionál no rekursu disponívél, no estabelese limitasaun depenza ba setór sira iha Administrasaun Públika.

Previsaun Kresimentu Ekonómiku no Inflasaun

Ministra Finansas apresénta mos previzaun krezimentu ekonómiku ba 2026, ho indikasaun katak Produto Internu Brutu (PIB) sei aumenta 2.7%, iha kontestu konsolidasaun orsamentál, hafoin estimativa 4.3% iha 2025. Taxa inflasaun iha 2025 sei tuun ba 1.8% no sei estabiliza ho medía 2% ba tinan sira ne’ebé mai.

Tétu Despeza Globál no Alokasaun Setoriál

Tétu indikativu globál ba depenza iha OJE 2026 fixa ona ho valor USD 1.85 millãu. Alokasaun tétu agregadu ba Orsamentu Administrasaun Sentral bazeia ba setór estratéjiku sira, tuir Programa Governu no Plano Estratéjiku Dezenvolvimentu.

Distribuisaun persentajen setoriál hanesan tuir mai:

·       Setór Enkuadramentu Institusionál: 36%

·       Setór Kapitál Sosiál: 28%

·       Dezenvolvimentu Infraestrutura: 28%

·       Dezenvolvimentu Ekonómiku: 7%

·       Boa Governasaun no Kombate Korrupsaun: 1%

Kalendáriu Prosesu Orsamentál

Prosesu preparasaun OJE 2026 sei halo tuir kalendáriu ofisiál ida ne’e:

·       4 Jullu: Distribuisaun tétu desagregadu ba entidade sira;

·       24 Jullu: Submisaun proposta orsamentál husi ministériu sira;

·       4–20 Agostu: Reuniaun Komité Revizaun Orsamentál;

·       1 Outubru 2025: Entrega proposta OJE 2026 ba Parlamentu Nasionál.

#MídiaMJDAK