DÍLI, 11 Jullu 2025 – Ministériu Juventude, Desportu, Arte no Kultura (MJDAK), liuhusi Koordenadór Jerál ba XII Jogu Desportivu da CPLP no Sekretáriu Estadu Arte no Kultura (SEAK), Jorge Soares Cristovão, lidera enkontru interministeriál importante ida ho pontu fokál ministeriu sira, hodi finaliza preparasaun ba realizasaun Jogu CPLP 2025 iha Timor-Leste.

Enkontru ne’e hala’o iha Salaun Magna MJDAK, Lecidere, Dili, ho partisipasaun husi reprezentante husi ministériu relevante sira, inklui Ministériu Defeza (MD), Ministériu Saúde (MS), Ministériu Negósiu Estranjeiru no Kooperasaun (MNEK), Ministériu Transporte no Komunikasaun (MTK), Ministériu Komérsiu no Indústria (MCI), no Ministériu Ensinu Superiór, Siénsia no Kultura (MESSK). Partisipa mós institusaun seguransa sira hanesan PNTL, F-FDTL no AACTL, hamutuk ho lideransa MJDAK, asesór no ekipa ténika sira.

Iha nia intervensaun, SEAK Jorge Soares Cristovão hateten katak enkontru ne’e atu atualiza progresu preparasaun ne’ebé Sekretariadu Jogu CPLP halo to’o agora. Nia konfirma katak delegasaun sira sei tama komesa husi loron 14 Jullu, ho delegasaun Giné-Bissau sei to’o uluk, hafoin delegasaun Angola iha loron 16, no delegasaun sira seluk iha loron 17 Jullu 2025.

Diskusaun foka ba planu operasional, seguransa, saude, transportes, akomodasaun no movimentasaun delegasaun. "Ita presiza hakmatek no hakarak fó seguransa, akomodasaun no transportasaun efisiente ba delegasaun sira, liuliu iha momentu sira tama ba aeroportu to’o iha hotél no ba venue jogu sira," hateten SEAK.

Koordenadór Jerál ne’e informa katak Brazíl no Giné Ekuatoriál mak país membru CPLP sira ne’ebé sei la partisipa. Nia konfirma mós katak Ministru sira sei tama iha loron 24–25 Jullu.

Jorge Soares Cristovão salienta katak preparasaun fiziku no lojístiku 100% kompletu ona. Nia hato’o konfiansa ba ezekusaun evento: "Ita sei hadia imajen Timor-Leste iha nivel internasionál. Timor hakarak hatudu katak iha kondisaun atu organiza konferénsia internasionál ka eventu desportivu internasionál."

SEAK mós fó mensajen apelu ba komunidade, lideransa lokál tanba sira nain aldeia no suku, ho juventude ba atu kontribui iha atmosfera ne’ebé fó seguransa, paz no hospitalidade ne’ebe diak. "Ne’e evento ita hotu nian – Estadu nian, Timor nian. Joven sira tenke sai figura prinsipál ba hadia imajen Timor ba mundu."

#MídiaMJDAK