DÍLI, 23 Maiu 2025 – Koordenadór Jerál ba XII Jogos Desportivos da CPLP 2025, atual Sekretáriu Estadu ba Arte no Kultura (SEAK), Sua Exelénsia Jorge Soares Cristovão, ohin hala’o enkontru ofisiál ho Ministra-Konselleira Rita de Cássia Lott Marques, Enkarregadu ba Asuntu Embaixada Brazil nian iha Dili. 

Enkontru ida-ne’e, ne’ebé mós iha partisipasaun ekipa téknika husi SEAK, fó prioridadi ba diskusaun kona-ba partisipasaun ofisiál ekipa Brazíl nian iha Jogos Desportivos CPLP 2025, ne’ebé sei akontese iha Timor-Leste husi loron 17 to’o 27 Jullu 2025.

Diskusaun foka ba aspetu logístiku sira, inklui akomodasaun, seguransa, transporte, no fasilitasaun ba delegasaun Brazíl nian. Objetivu prinsipal mak atu garante preparasaun jerál no koordinasaun di'ak entre Timor-Leste no Brazíl, nu’udar membru fundadór no parte importante iha Komunidade dos Países de Língua Portuguesa (CPLP).

Koordenadór Jerál Jorge Soares Cristovão hateten katak:
"Timor-Leste fó importânsia boot ba kolaborasaun ho nasaun partisipante sira, espesiálmente Brazíl, atu bele realiza Jogos CPLP ne'e ho nivel internasionál no fo imajen di'ak Timor-Leste iha rai-liur."

Enkontru ida-ne’e kontribui ba fortalesimento relasaun diplomátiku no desportivu entre Timor-Leste no Brazíl, hanesan parte husi ezersa solidariedade CPLP nian.

#MídiaMJDAK