Díli, 30 Abril 2025 – Ministériu Juventude, Desportu, Arte no Kultura (MJDAK),Sua Exelénsia Ministru Nelyo Isaac Sarmento, reprezenta Primeiru Ministru, Sua Exelénsia Kay Rala Xanana Gusmão, hamutuk ho Ministru Komérsiu no Indústria (MCI), Sua Exelénsia Nino Pereira, akompaña husi Sekretáriu Estadu Arte no Kultura (SEAK), Sua Exelénsia Jorge Soares Cristóvão, ofisialmente ensera atividade Seminariu Salvaguarda Urjente Tais 2022-2025. Eventu seminariu nasional ho tema inspiradór "Dalan ba Rekoñesimentu Tais Nu'udar Lista Representativu ba Patrimóniu Kultural ba Umanidade" ne’e hala’o iha Salaun Delta Nova, Díli, Timor-Leste.

Sua Exelénsia Ministru Nelyo Isaac Sarmento hateten katak objetivu sentrál husi atividade importante ne’e mak atu eleva koñesimentu jerasaun foun sira-nian, liuliu estudante sira, kona-ba prosesu soru tais. Inisiativa ne’e ho intensaun atu asegura katak jerasaun hotu-hotu sei kontinua prezerva no salvaguarda tais nu’udar identidade úniku Timor-Leste nian.

“Ha’u sente orgullu no kontente tebes tanba bele partisipa iha eventu ida ne’e no haree partisipasaun másimu husi joven sira. Sira mak riku soin Timor-Leste nian atu asegura orijinalidade ita-nia tais nian. Esforsu hotu ne’ebé komisaun hala’o iha objetivu ida de’it: oinsá ita bele garante katak ita-nia tais sei kontinua moris husi jerasaun ba jerasaun. Importante liu ba ita mak oinsá atu hatudu ba jerasaun hotu-hotu katak tais ne’e ita-nian duni no ita tenke kontinua prezerva iha kualker atividade tanba tais iha valór kulturál no mós valór ekonómiku. Governu esforsu maka’as atu inklui tais iha kurríkulu eskola nian tanba bainhira estudante sira aprende atu halo kahur ai-kulit hodi sai kores ba tais. Ho ida ne’e, ha’u husu ita hotu iha ne’e atu hahú ohin ba oin atu hadomi tais iha ita-nia rai laran,” dehan Ministru Nelyo Isaac ho entuziasmu.

Atividade Salvaguarda Urjente Tais ne’e envolve partisipante sira husi munisípiu 12 inklui Rejiaun Administrativu Espesiál Oekusi Ambenu (RAEOA), kompostu husi grupu soru tais oioin. Aleinde ne’e, iha eventu ne’e mós hala’o lansamentu ba website dedikadu ba tais no lansamentu ba livru patrimóniu kulturál Timor-Leste nian. Iha mós serimónia distribuisaun sertifikadu apresiasaun ba instituisaun sira ne’ebé kontribui signifikativamente ba salvaguarda tais.

Atividade ne’e partisipa husi 12 Munisípiu inklui RAEOA, grupu soru Tais, estudante-eskolár husi São Pedro Comoro, Anur, Cristal, no Canosa, nune’e mós Embaixadór husi Malaysia no Thailandia.

#MediaMJDAK