DÍLI, 10 jullu 2025 – Ministériu Juventude, Desportu, Arte, no Kultura (MJDAK) halo hela preparasaun maka’as hodi trasa nia orsamentu tinan fiskál 2026, tuir alokasaun orsamentu global USD millaun 1,85 ne’ebé Konsellu Ministru aprova ona.

Iha ámbitu ne’e, MJDAK fó prioridade ba programa estratéjiku sira iha área juventude, desportu, arte, no kultura, ne’ebé tama iha kategoria Kapitál Sosiál, ho dotasaun 28% hosi Orsamentu Estadu 2026 nian.

Prosesu deliberasaun interna durante semana ida ne’ebé prezide husi Sua Exelénsia Ministru MJDAK Nelyo Isaac Sarmento, hala’o iha Salaun Magna MJDAK iha Lecidere. Partisipa  iha diskusaun ne’e Sekretáriu Estadu Arte no Kultura (SEAK), Jorge Soares Cristóvão, Diretór Jerál, Diretór Nasionál, Xefe Gabinete, asesór sira, no tékniku relevante sira.

Objetivu prinsipál sira hosi konsultasaun ne’e maka: Haree filafali implementasaun OJE 2025 tuir Planu Asaun Anuál (RAPBN); Estabelese prioridade sira programa nian ne'ebé fó impaktu diretamente ba komunidade benefisiáriu sira; no Dezenvolve proposta orsamentu bazeia ba evidénsia no kapasidade implementasaun.

"Ami nia prioridade maka fó impaktu ba juventude, artista sira, atleta sira, no komunidade. Proposta orsamentu sira tenke realistiku, bazeia ba evidénsia, no implementavel," dehan Ministru Nelyo Isaac Sarmento.

Iha kuadru OJE 2026 nia laran, Governu distribui alokasaun orsamentu hodi hametin polítika estratéjiku sira. Alokasaun sira ne’e inklui: Enkuadramentu Institusionál (36%), Kapitál Sosiál (28%), Infraestrutura (28%), Dezenvolvimentu Ekonómiku (7%), no Boa Governasaun (1%). 

MJDAK sei kontinua prepara dokumentu orsamentál finál, inklui justifikasaun téknika, planu atividade sira, no indikadór impaktu sira, ne’ebé sei submete iha tempu loloos ba avaliasaun husi Ministériu Finansas. Esforsu ida-ne’e hatudu MJDAK nia kompromisu atu jere rekursu públiku sira ho efisiénsia no transparénsia, nune’e garante sustentabilidade no impaktu programa prioridade sira ba tinan fiskál 2026 nian.

#MídiaMJDAK