Díli, 17 Fevereiru 2025 – Diretór Jerál Juventude husi Ministériu Juventude, Desportu, Arte no Kultura (MJDAK), David Tomás de Deus, hamutuk ho Diretór Nasionál Dezenvolvimentu Juventude, Firmino Dias Quintas, partisipa iha aprezentasaun no diskusaun konsultativu kona-ba koperasaun ba Planu Estratéjiku Foun 2026–2030 entre Governo Timor-Leste no Fundo das Nações Unidas para a População (UNFPA). Atividade ne’e realiza iha Salaun Nobre Ministériu Negósius Estranjeirus no Koperasaun (MNEC) no fó abertura ofisiál husi Sua Exelénsia Ministru MNEC, Bendito dos Santos Freitas.

Iha diskursu abertura nian, SE Bendito dos Santos Freitas subliña importánsia konstituisaun sosiedade ida saudável, harmonia no paz, ne’ebé presiza fasilitasaun no kapasitasaun ba servisu assisténsia saúde reprodutiva, partikularmente ba alin feto, inan isin rua, no mós juventude.

“Programa UNFPA mak fó prioridade ba saúde no bem-estar feto no jovem sira. Ita atu konstitui sosiedade saudável, tenke fó atensaun ba moris feto sira, edukasaun kona-ba sexualidade segura, higiene, no prevensaun mortalidade maternal,” hateten Ministru Bendito Freitas.

UNFPA hanesan parseiru importante ba Governu Timor-Leste, iha kooperasaun ho doadór sira hanesan Governo Japaun atu sustenta klinika komunidade no infraestrutura saúde iha nivel base.

Enkuantu tuir Diretór Jerál Juventude (DJJ), David Tomás de Deus, MJDAK nia kontribuisaun iha prosesu konsultativu ne’e mak fó enfázi ba formasaun relasaun saudavél entre juventude, liuhusi edukasaun kona-ba saúde reprodutiva, direitus humanus, igualdade géneru no prevene violénsia.

“Importante atu halo juventude hatene kona-ba direitu reprodutivu sexual, relasaun saudavél no seguransa iha moris di'ak. Juventude tenke hetan informasaun ne’ebé fó proteksaun ba sira-nia saúde física no mental,” hateten DJJ.

Atividade ne’e hetan partisipasaun husi reprezentante UNFPA, Delegasaun Japaun iha Timor-Leste, MJDAK, no liñas ministeriais relevantes hanesan MS, MNEC, ME, Institutu Nasionál Estatistíka Timor-Leste, NGO sira, no organizasaun juventude.