Díli, 3 Fevereiru 2025 – Ministériu Juventude, Desportu, Arte no Kultura (MJDAK), liideradu husi Diretóra Jerál Servisu Kooperativu, Isabel Adalziza Fátima Rodrigues Ferreira, halo reuniaun ofisiál ho delegasaun husi Embaixada Republika Indonézia (KBRI) atu diskute oportunidade programa bolsu estudu ba funsionáriu sira. Reuniaun ne’e hala’o iha Salaun Magna MJDAK, Lecidere, Díli.

Iha diskusaun nian, Diretóra Jerál Isabel Adalziza F. Rodrigues fó agradecimento ba KBRI nia inisiativa no kontinuidade kooperasaun edukativu, ne’ebé sei fó impaktu diretamente ba kapasidade funsionáriu sira iha servisu públiku.

“Ami agradese ba Embaixada Republika Indonézia tanba suporta kooperasaun ida ne’e, ne’ebé sai hanesan ponti amizade entre povu rua nian. Bolsu estudu ida ne’e bele kontribui atu hasae kapasidade funsionáriu sira no fó kontribuisaun ba dezenvolvimentu nasional,” hateten Diretóra Jerál Isabel.

Husi parte Embaixada Indonézia, Prof. Dr. Phil. Ikhafan Haris, M.Sc, esclarese katak programa bolsu estudune’e mak parte husi inisiativa governu Indonézia atu suporta dezenvolvimentu rekursu umanu iha Timor-Leste, liuliu iha área desportu.

“Programa ne’e iha forma Basharelatu, Mestradu no Doutoramentu. Ami buka asesu ho ministériu relevante hanesan MJDAK atu garante katak bolsu estudu sira ne’e responde ba nesesidade real iha área desportu no edukasaun,” nia dehan.

Reuniaun ne’e konsidera sai pasu importante ba fortalese relasaun bilateral no mós kooperasaun téknika iha domíniu edukasaun, kapasita servisu públiku no fortalese solidariedade entre Timor-Leste no Indonézia.

Diskusaun ne’e mós hetan partisipasaun husi kagu xefia no funsionariu MJDAK, no ekipa ténika husi KBRI.

#MídiaMJDAK