Dili, 8 Janeiru 2025 - Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha sorumutu ordináriu Konsellu Ministrus, hala’o iha Palásiu Governu, Dili. Sorumutu ne’e prezidi husi Primeiru-Ministru Kay Rala Xanana Gusmão no aborda desizaun importante ba solidariedade internasionál no dezafiu dezenvolvimentu nasionál.
Konsellu Ministrus aprova projetu Rezolusaun ne’ebé aprezenta husi Primeiru-Ministru kona-ba fó doasaun ho valór $2,000,000 ba Repúblika Vanuatu. Rai-nakdoko magnitude 7.3 ne’ebé akontese iha loron 17 fulan-dezembru tinan 2024 iha Port Vila, rezulta ema na'in-23 mate, 200 liu hetan kanek, no estraga maka’as iha infraestrutura esensiál, inklui Ospitál Sentrál no rezervatóriu bee. Desizaun ida-ne’e mostra forte solidariedade no kooperasaun entre povu sira.
Iha sorumutu ne’e, aprova tan Projetu Proposta Rezolusaun tolu, ne’ebé sei submete ba Parlamentu Nasionál:
Akordu Servisu Aéreu ho Repúblika Populár Xina no Reinu Kamboja, hodi hametin amizade, promosaun transporte aéreu no turizmu.
Akordu Izensaun Vistu ho Repúblika Demokrátika Populár Laos, hodi permite entrada no estadia to’o loron 30 ba titulár sira pasaporte komún.
Rezolusaun sira-ne’e parte husi ezforsu atu hametin relasaun amizábel ho nasaun ASEAN no alinhamenntu ho politíka "Céu Aberto".
Konsellu Ministrus aprova mós projetu Dekretu-Lei kona-ba desentralizasaun administrativa, inklui:
• Balkaun Úniku no Portál Munisipál: Hodi simplifika prosedimentu servisu públiku, hadi’a efisiénsia, no aproxima servisu administrativu ba sidadaun sira.
• Alterasaun ba PNDS: Halo ajustamentu kona-ba finanseamentu no ezekusaun programa, hodi responde ba ezijénsia administrativa no finanseira iha kontestu desentralizasaun.
Aprova Referensiál Polítika Kooperasaun Internasionál, hodi estabelese matadalan sira kona-ba kooperasaun militár iha área defeza. Dokumentu ida-ne’e sei orienta asuntu sira kona-ba parsería estratéjika no jestaun kooperasaun ho nasaun belun sira.
Primeiru-Ministru Kay Rala Xanana Gusmão halo apresentasaun kona-ba Programa Lejizlativu Governu IX nian, ne’ebé sei estruktura prioridades ba intervensoins lejizlativas hodi suporta dezenvolvimentu sira iha tinan 2025.
ha sorumutu ida-ne’e, Ministra Finansas, Santina José Rodrigues F. Viegas Cardoso, aprezenta regras ezekusaun ba Orsamentu Jerál Estadu (OJE) 2025, ne’ebé establiza ba implementasaun no monitorizasaun.
Konsellu Ministrus ne’e mostra forte kompromisu Governu IX atu promove solidariedade internasionál, fortifika governasaun lokál, no prepara politika sira hodi responde ba dezenvolvimentu no desafius futuru.
#MédiaMjdak
