Dili, 9 Maiu 2025 — Sua Exelénsia Primeiru-Ministru Kay Rala Xanana Gusmão ofisialmente abertura Tasa Funsaun Públika ba dala 11 iha Kampu Futsal Bebora, Dili. Serimónia ne'e hetan partisipasaun husi membru Governu Konstitusionál IX, Prezidente Komisaun Funsaun Públika, no Ministru Juventude, Desportu, Arte no Kultura (MJDAK), Nelyo Isaac Sarmento.

Iha nia diskursu abertura, Primeiru-Ministru Xanana Gusmão subliña katak Tasa Funsaun Públika ne'e parte integrál husi selebrasaun Loron Nasionál Funsaun Públika ba dala 11. Nia hateten katak desportu importante tebes atu hametin kamaradajen, integridade, no motivasaun ba funsionáriu públiku sira atu kontinua halo servisu ho dedikasaun.

"Selebrasaun ne'e la'ós de'it kompetisaun, maibé hanesan oportunidade atu rekorda ita-nia responsabilidade ba povu. Manán ka lakon, buat importante maka espírito amizade no komprensaun mútua ne'ebé jogu sira-ne'e promove," Primeiru-Ministru Gusmão dehan.

Ministru MJDAK, Nélio Isaac Sarmento, mós aprezenta nia mensajen ba partisipante sira, hodi subliña importánsia desportu nian iha promosaun unidade no moris-di'ak entre funsionáriu públiku sira.

Jogu abertura Tasa Funsaun Públika 2025 envolve ekipa husi Ministériu Finansas no Eletrisidade Timor-Leste (EDTL, E.P.), ne'ebé halo jogu futsal. Torneiu ne'e sei kontinua ho kompetisaun iha modalida futsal, voleiból, no basketebol, ho partisipasaun husi instituisaun governamentál sira.

Tasa Funsaun Públika hanesan eventu anuál ne'ebé ho objetivu atu fortalece relasaun inter-institusionál no promove estilu moris saudavel entre funsionáriu públiku sira. Eventu ne'e mós hanesan plataforma atu estimula espírito ekipa, reziliénsia, no kompromisu ba exelénsia iha servisu públiku.