DILI, 05 Juñu 2025 – Sekretáriu Estadu ba Arte no Kultura (SEAK), Sua Exelénsia Jorge Soares Cristovão, ohin hala'o enkontru kortejia ho Omólogu Sekretária de Estado para as Artes e Cultura da República de Moçambique, Sua Exelénsia Matilde Martins Muocha. Sorumutu ne'e hala'o iha Salaun VIP-MNEK, Praia dos Coqueiros, Díli, ho objetivu atu diskuti kooperasaun no interkambiu kulturál entre Timor-Leste no Repúblika Mozambike ba futuru.

Enkontru ida-ne'e marka pasu importante ida iha hametin relasaun bilaterál entre nasaun membru Komunidade País sira Lian Portugés (CPLP) ne'e, liu husi setór arte no kultura. Diskusaun sira foka ba potensiá kolaborasaun hodi troka esperiénsia, promove artista sira, no dezenvolve inisiativa kulturál konjunta sira.

Hafoin remata enkontru, Sekretáriu Estadu SEAK akompaña kedas Sua Exelénsia Sra. Matilde Martins Muocha ba vizita Arte no Cinema Oceana Exhibition iha Fundação Oriente. Vizita mós kontinua ba Galeria Maun Boot Xanana, ne'ebé lokaliza iha Xanana Reading Room, hodi hatudu riku-nasaun artístika no istóriku Timor-Leste nian.

Vizita no enkontru ida-ne'e reflete kompromisu Governu Timor-Leste nian, liuhusi SEAK, atu partisipa ativamente iha kooperasaun internasionál, espesialmente ho nasaun sira husi família CPLP, hodi fortalese ligasaun kulturál no promove diversidade artístika.

Foto Kredit: MediaSEAK

#MídiaMJDAK