DÍLI, 23 Maiu 2025 – Ministériu Juventude, Desportu, Arte no Kultura (MJDAK), liuhusi Komisaun Nasionál Desportu (KND), hala’o workshop kona-ba Rejime Anti-Doping ba estudante Eskola Sekundária São Pedro iha Komoro, Díli, hanesan parte husi esforsu atu disemina informasaun kona-ba prinsipiu desportu ne’ebé livre husi dopajen.

Atividade ne’e organiza ho lideransa Sekretáriu Ezekutivu KND, Cesarino da Silva, no fasilita husi formadór Karry Pither Galhos no Carlos da Cunha, hamutuk ho ekipa téknika KND. Total partisipante mak estudante na’in 37, profesór na’in rua no ekipa téknika sira.

Iha diskursu abertura, Sekretáriu Ezekutivu Cesarino da Silva hateten katak MJDAK hili Eskola S. Pedro tanba eskola ne’e sai hanesan modelu ba envolvimentu forte iha atividadi desportiva no mak halo partisipasaun regular iha kompetisaun sira.

“Ministériu hili Eskola São Pedro tanba ami haree katak eskola ne’e bele kontinua promove no forma estudante sira ne’ebé iha talentu iha área desportu. Informasaun kona-ba Anti-Doping sei ajuda sira atu komprende responsabilidae sira iha loron futuru,” hateten Cesarino.

Workshop ne’e fó dadus kona-ba konseitu dopajen, sustánsia ne’ebé proíbe, no konsekénsia legál ba atleta sira ne’ebé la respeita regra anti-doping, hanesan parte husi edukasaun prevensaun ba juventude.

Entretanto, profesór responsavel ba Asuntu Estudantil, Cristóvão dos Santos, hato’o agradesimento ba MJDAK no KND tanba fó oportunidade importante ne’e ba estudante São Pedro sira.

“Informasaun hanesan ne’e di'ak tebes ba estudante sira, liuliu tanba iha entre sira barak mak agora envolvidu iha atividade desportiva. Dala ruma informasaun ne'e la fasil atu hetan iha eskola,” deklara profesór Cristóvão.

Workshop ne’e parte husi kampaña nasional edukasaun anti-doping no sei kontinua hala’o iha eskola seluk iha futuru.

#MídiaMJDAK