DÍLI, 11 Juñu 2025 – Sua Exelénsia Sekretáriu Estadu Arte no Kultura (SEAK), Jorge Soares Cristovão, nu'udar Koordenadór Jerál XII Jogos CPLP 2025, ohin lidera reuniaun interministeriál ho pontu fokál sira husi liña ministeriál relevante sira. Sorumutu ne'e hala'o iha salaun Magna MJDAK, Lecidere, Díli, ho objetivu atu halo preparasaun finál ba jogu internasionál ne'e, tuir rezolusaun Governu n. 74/2024, loron 18 Novembru.

Durante reuniaun, Sekretáriu Estadu Cristovão partilla informasaun provizóriu husi sekretariadu CPLP nian, ne'ebé hatete katak delegasaun nasaun partisipante sira hotu sei hahú to'o iha Díli iha loron 17 fulan-jullu 2025.

Informasaun kona-ba Delegasaun Sira-nia To'o:

• Delegasaun husi Angola, Cabo Verde, São Tomé no Príncipe, no Mosambike sei to'o hamutuk ho aviaun Angola nian iha Aeroportu Rejiaun Administrativa Espesiál Oe-Kusi Ambenu (RAEOA) iha loron 17 fulan-jullu 2025, purvolta tuku 10:00 OTL. Sira sei hakat liu mai Díli, ho koordenasaun ho parte Ministériu Transporte no Komunikasoins (MTC) ba ligasaun ho kompañia aero sira, liuliu Aero Díli, hodi asegura transporte ba Díli.
• Delegasaun husi Portugal, Giné-Bisau, no Giné Ekuatoriál mós sei to'o iha loron 17 fulan-jullu 2025. Portugal halo kontaktu diretu ona ho Aero Díli hodi lori delegasaun husi Denpasar, Bali mai Díli. Parte Giné-Bisau no Giné Ekuatoriál mós iha faze diskusaun hela atu koordena ho sira-nia nasaun to'o mai Denpasar, Bali no depois ba Díli.

Kona-ba Infraestrutura no Sériemonia: Sekretáriu Estadu informa mós kona-ba preparasaun infraestrutura no kampu sira ne'ebé sei uza. Estádiu Munisipál Díli, kampu volí praia, kampu ténis, no Jináziu Desportiva Díli (GDD) ne'ebé sei uza ba basketból, taekwondo, no karate-do, previstu sei remata iha fin fulan-juñu ida-ne'e. Abertura ofisiál XII Jogos CPLP sei hala'o iha Estádiu Munisipál Díli, hahú iha tuku 18:30 OTL, no tuir kedas serimónia ne'e, sei hahú kedas jogu primeiru ba futeból, mós iha Estádiu Munisipál Díli.

Seguransa, Saúde no Protokolu: Diskusaun mós inklui asuntu seguransa ho prezensa husi PNTL, kestaun saúde ba atleta no delegasaun sira, no arranju protokolu ba delegasaun Ministru sira ne'ebé sei mai partisipa iha Konferénsia Ministrus Juventude no Desportu CPLP nian, ne'ebé sei hala'o iha loron 25 fulan-jullu 2025 iha CCD.

Kooperasaun no Apoiu: Komisaun hetan apoiu masimu husi Ministériu Edukasaun, ne'ebé kolabora ona ho MJDAK hodi asegura katak atleta sira ne'ebé konsentra iha TC Otel Ramelau, inklui sira ne'ebé mai husi munisípiu sira, nafatin kontinua sira-nia eskola. Komisaun mós servisu hamutuk ho MTC atu koordena ho Sekretariadu Estadu Komunikasaun Sosiál (SECOMS) hodi estabelese sentru média ida ba kobertura notísia. Koordenasaun ho parte imigrasaun mós halo ona ba delegasaun sira-nia to'o.

Reuniaun ne'e partisipa husi ekipa téknika sira husi Ministériu sira, hanesan Xefe Gabinete MJDAK, Asesór Planeamentu no Programasaun, Asesór Komunikasaun no Relasaun Públika, Asesora Média no Marketing, Koordenadora GCI-MJDAK, Diretór Nasionál Desportu Federadu, no Diretór Nasionál Rekursu Umanu.

#MídiaMJDAK