Dili, 24 Abril 2025 - Governu Timor-Leste, liu husi Ministeriu Juventude Desportu, Arte no Kultura (MJDAK), offisializa ona Telkomcel Timor-Leste nu’udar parseiru ofisial governu nian ba XII Jogos Desportivas CPLP 2025 ne’ebe sei realiza iha Dili, Timor-Leste hahu loron 17 to’o 27 fulan Jullu.
Estatutu Telkomcel nu’udar parseiru ofisial ne’e asina liu husi akordu kooperasaun ou Memorandum of Understanding (MoU) ne’ebe asina husi Ministru Juventude, Desportu, Arte no Kultura (MJDAK), Nelyo Isaac Sarmento (NIS) ho CEO Telekomunikasi Indonesia Internasional, S.A, Benedictus Ardiyanto Priyo, Kinta (24/04/2025), iha Palm Spring Hotel, Fatuhada, Dili.
Nu’udar parseiru ofisial, Telkomcel sei produz material prinsipal sira ne’ebe sei fahe ba delegasaun no atleta sira husi nasaun 9, inklui fornese sim card gratuitu kompletu ho internet durante loron realizasaun ba kontijenti sira, inklui komisaun organizadora no voluntariu sira, inklui mos rejistrasaun online delegasaun husi nasaun 9 ne’ebe hetan apoia teknika hosi telkomcel hodi ajuda rejistrasaun iha plataforma online nian.
“Governu hili Telkomcel sai hanesan patrosinador prinsipal ba jogu CPLP ne’e, tanba jogu ne’e hanesan festa desportu ida, nune’e parte governu mos nakloke ba publiku sira ne’ebe iha interesante atu bele apoiu atividade governu nian, mais governu atraves MJDAK hetan pozitivu makas mak Telkomcel, ho resposta ne’ebe Telkomcel fo parte MJDAK simu, ida ne’e inisiativa diak, tanba Telkomcel mai ho vontade rasik no hakarak apoiu masimu ba jogu CPLP ne’e rasik,” dehan Ministru NIS.
Mesmu Telkomcel hanesan patrosinador prinsipal, Governu kontinua loke odamatan nafatin ba seitor privadu no industria sira ne’ebe hakarak mos sai parseiru ba eventu refere.
Enkuantu CEO Telkomcel Benedictus Ardiyanto Priyo hatete kolaborasaun ne’e nu’udar pilar importante ida ba Telkomcel hodi hametin kolaborasaun entre setór sira, enkoraja inovasaun lokál, dezenvolve potensiál juventude nian, no prezerva no promove patrimóniu kulturál Timor-Leste nian iha nível mundiál hamutuk ho governu Timor-Leste.
“Kolaborasaun ida ne’e hanesan manifestasaun loloos husi kompromisu Telkomcel nian hodi enkoraja inovasaun no harii futuru juventude Timor-Leste nian ne’ebé aumenta ligasaun dijitál sein haluha sira-nia abut kulturál no identidade nasionál,” esplika Benedictus Ardiyanto Priyo.
Embaixadora Indonesia mai Timor-Leste, Okto Dorinus Manik hato’o nia agradesementu ba Governu Timor-Leste, espesialmente MJDAK ne’ebe fo ona fiar ba Telkomcel nu’udar empreza publiku Indonesia nia hodi sai patrisinador prinsipal ba Jogos Desportivos CPLP 2025 ne’e.
Hola prezensa mos iha seremonia asina MoU ne’e, Sekretariu Estadu Arte no Kultura, Jorge Soares Cristovao, no Xefi Misaun Timor-Leste ba XII Jogos Desportivos CPLP 2025, Joao Rodrigues atual Diretor Jeral Desportu iha MJDAK, no mos entidade balun husi MJDAK no Telkomcel.
#MediaMJDAK
