Díli, 6 Fevereiru 2025 – Ministru Juventude, Desportu, Arte no Kultura (MJDAK), Sua Excelência Nelyo Isaac Sarmento (NIS), hala’o reuniaun ho Federasaun Taekwondo Timor-Leste atu diskute preparasaun atletas sira ba partisipasaun iha Jogos da CPLP 2025. Reuniaun ne’e realiza iha Salaun Magna MJDAK, Lecidere, Díli, ho objetivu fó orientasaun no asegura kualidade atletas nian ba kompetisaun internasionál.

Iha diskusaun ne’e, Ministru Nelyo Isaac subliña importánsia preparasaun atleta sira hodi halo reprezenta asaun di’ak ba nasionál. "Tinan ida ne’e mak tinan importante ba desportu nasional. Ami ezije katak atletas sira iha kondisaun fízika no ténika ne’ebé di’ak atu bele kompete ho di’ak iha Jogos CPLP no eventu internasionál seluk," dehan Sua Excelência Nelyo.

Prezidente Federasaun Taekwondo Timor-Leste, Gabriel da Costa, hateten katak seleksaun atletas halo ona husi tinan kotuk, ho atleta nain haat (feto rua no mane rua) ne’ebé sei partisipa iha Jogos CPLP. "Atleta sira ne’e iha klasifikasaun kategoria 46 kg no 55 kg. Maibé, ida husi atleta sira nia idade liu tiha ona, tan ne’e ami sei substitui ho atleta ne’ebé iha prestasaun di’ak liu husi seleksaun tinan kotuk," esplika Gabriel.

Nia mós revela katak, tuir planu, atleta taekwondo sei partisipa iha kompetisaun internasionál ida iha Korea iha fulan Maiu no seluk iha Afeganistán iha fulan Outubru 2025, atu reforsa preparasaun ba Jogos CPLP.

Reuniaun ne’e mós partisipa husi Diretor Jerál Desportu, ekipa téknika husi Federasaun Taekwondo, no ofisiál MJDAK, ne’ebé fó kontribuisaun iha diskusaun kona-ba planu operasionál no estratégia dezenvolvimentu atletas nian.