Dili, 6 Fevereiru 2025 – Ministériu Juventude, Desportu, Arte no Kultura (MJDAK), liu husi Sua Excelénsia Nelyo Isaac Sarmento(NIS), Ministru Juventude, Desportu, Arte no Kultura, hamutuk ho Diretór Jerál Desportu, Diretór Nasionál, Xefe Gabinete, no Asesor, hala’o reuniaun ho Federasaun Nasional Basketbol Timor-Leste (FNBTL).

Reuniaun ne’e foka ba diskusaun kona-ba programa desportu ba tinan 2025 no preparasaun ba eventu boot Jogu Komunidade Paízes de Língua Portuguesa (CPLP), ne’ebé sei hala’o iha fulan Julhu 2025. Reuniaun hala’o iha Salaun Magna MJDAK, Lecidere, Dili.

Iha okaziaun ne’e, Ministru Nelyo Isaac hateten katak MJDAK sei konsidera atu organiza kompetisaun aberta ba eskola sira iha munisípiu sira, partikularmente ba jovem sira ho idade 15 to’o 16 anos. Objetivu kompetisaun ne’e mak atu halo seleksaun ba atleta sira ne’ebé sei reprezenta Timor-Leste iha Jogu CPLP.

Aléndene'e, Ministru subliña katak FNBTL tenke servisu maka’as atu aumenta kualidade basketbol nasional liu husi liga kompetisaun regular iha tinan 2025. Ne’e sei permite seleksaun di’ak liu ba atleta sira atu partisipa iha eventu internasionál hanesan SEA Games.

Husi parte Federasaun Nasional Basketbol Timor-Leste, Prezidente FNBTL Joaquim José Martins hateten katak Federasaun kontente tebes ho inisiativa ne’ebé MJDAK fó. Inisiativa ne’e hatudu katak Governu suporta no rekoñose Federasaun Nasional Basketbol hodi dezenvolve desportu iha Timor-Leste, liuliu preparasaun ba eventu boot hanesan Jogu CPLP.

Joaquim José Martins mos esplika katak Federasaun iha atividade balu ne’ebé la’o ona no balu seidauk, maibé sei kontinua hala’o ho kapasidade ne’ebé iha.

Reuniaun ne’e marka kompromisu forte entre MJDAK no FNBTL atu fortifika desportu basketbol iha Timor-Leste, liuliu prepara atleta sira hodi reprezenta nasaun iha eventu internasionál sira.