DILI, 02 Junu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin sai Inspetór ba serimónia isar bandeira nasionál ba primeiru semana fulan Junu nian. Iha ámbitu solene ne'e, Ministru Nelyo Isaac klarifika regulamentu kona-ba isar bandeira nasionál no husu funsionáriu hotu atu ativu partisipa iha preparasaun ba XII Jogos Desportivas CPLP 2025. Serimónia ne'e hala'o iha resintu MJDAK, Lecidere, Díli.

Iha nia diskursu, Ministru Nelyo Isaac Sarmento (NIS) fó esplikasaun klaru ba funsionáriu sira kona-ba lei isar bandeira nasionál. Nia hateten katak, tuir lei, kada primeiru semana iha fulan-fulan, ita fó onra ba mártir no erói sira liuhusi hasa'e bandeira. Maibé, nia klarifika katak ba fulan Maiu no Novembru, serimónia isar bandeira la hala'o iha instituisaun Estadu sira exetu ba loron nasionál boot sira hanesan 20 Maiu (Restaurasaun Independénsia) no 28 Novembru (Proklamasaun Independénsia). "Bainhira ita hasa'e bandeira iha ita-nia instituisaun Estadu, ne'e katak ita-nia seremónia solene ida atu ita fó onra ba ita-nia pátria, mártir no erói sira hotu," Ministru NIS afirma, hodi subliña signifikadu profundu husi asaun ne'e ba formasaun nasionálismu no patriotismu ba jerasaun foun.

Aleinde asuntu nasionál, Ministru Nelyo Isaac Sarmento mós aproveita okaziaun ne'e atu halo apelu ba funsionáriu MJDAK tomak. Tanba Timor-Leste sei sai uma-na'in ba XII Jogos Desportivas CPLP 2025 ne'ebé sei realiza iha fulan Jullu, Ministru husu ba funsionáriu hotu atu "involve a'an iha ekipa" hodi ajuda Komisaun Organizadora no asegura susesu ba eventu boot ida-ne'e. Nia reitera katak Ministériu, nu'udar instituisaun harii ho obrigasaun no dever, iha responsabilidade atu hatutan buat ne'ebé halo ba komunidade sira tomak.

#MídiaMJDAK