DÍLI, 24 Juñu 2025 – Ministériu Juventude, Desportu, Arte no Kultura (MJDAK) ohin dader hala'o reuniaun interna ida hodi diskuti kona-ba preparasaun ba Jogos Desportivos Comunidade dos Países de Língua Portuguesa (CPLP) ne'ebé sei realiza iha loron 17 to'o 27 Jullu 2025. Reuniaun ne'e lidera husi Sua Exelénsia Ministru Juventude, Desportu, Arte no Kultura, Nelyo Isaac Sarmento, akompañadu mós husi Sua Exelénsia Sekretáriu Estadu Jorge Soares Cristovão, hamutuk ho Diretores, Asesores, inklui Xefe Gabinete sira. Enkontru ne'e hala'o iha Salaun Magna MJDAK, Lecidere, Díli.

Iha diskusaun, Ministru Nelyo Isaac Sarmento (NIS) hato'o orientasaun ba komisaun sira hotu ne'ebé partisipa iha reuniaun, atu akresenta informasaun detallada liu, liuliu kona-ba preparasaun ba selesaun nasionál, kondisaun alojamentu sira, no oinsá atu organiza transporte ba delegasaun sira hotu, inklui motorista ba voluntáriu sira no fó subsídiu ba sira. Ministru Nelyo mós salienta katak atensaun prinsipál sei foka ba preparasaun serimónia abertura ba Jogu CPLP ne'e rasik.

"Ha'u fó atensaun ba imi hotu iha alvu hanoin nian atu haree esplikasuan detallu ida husi imi, tanba fulan oin ita sei hahú ona Jogu CPLP nian. Ita labele ezize malu, maibé tenke iha orientasaun ida no desizaun ida hodi foka ba alvu servisu," dehan Ministru Nelyo.

Ministru Nelyo Isaac mós akresenta katak eventu Jogu Desportivu CPLP ne'e la'ós de'it atu selebra ka hatudu kapasidade, maibé atu transforma hanoin foun ida ba jerasaun tuir mai hodi hatudu nu'udar Timor-oan katak Timor agora iha ne'ebé, to'o ona iha ne'ebé, no ba ne'ebé. "Ita hotu-hotu iha ne'e hakarak hatudu ba sira. Dalaruma ita ezize, maibé ita la hatene katak ita sei to'o iha ne'ebá ka lae, hodi nune'e ita tenke presiza fó hanoin ba sira," nia realsa. Nia mós kompara treinador nu'udar mestre, hanesan inan-aman mós hodi eduka oan sira ba futuru di'ak, hodi hanorin labarik no jerasaun sira ne'ebé maduru iha sira-nia forsa rasik, responsabiliza ba sira-nia an rasik no bele serve ema seluk.

#MídiaMJDAK