Dili, 4 Marsu 2025 – Ministru Juventude, Desportu, Arte, no Kultura (MJDAK), Sua Exelénsia Nelyo Isaac Sarmento (NIS), hala’o enkontru ho Ajénsia Dezenvolvimentu Nasionál (ADN.IP) ohin iha Salaun Magna MJDAK, Sional Lecidere, Dili. Enkontru ne’e ko’alia liu kona-ba dezenvolvimentu infraestrutura ba instalasaun desportiva sira, partikularmente reabilitasaun Estádiu Munisipál Dili nian, nu’udar preparasaun ba Jogu CPLP 2025, ne’ebé Timor-Leste sei sai uma-na’in.

Durante diskusaun, Ministru Nelyo Isaac subliña nesesidade ba ADN.IP atu halo verifikasaun ba implementasaun projetu sira, hodi garante katak orsamentu sira ne’ebé aloka utiliza ho efetivu hodi kompleta hadi’a infraestrutura sira ne’ebé planeadu. NIS mós reafirma kompromisu governu nian atu entrega projetu sira iha prazu kontratuál nia laran molok hahú Jogu CPLP nian.

Enkontru ne’e hetan partisipasaun husi ekipa tékniku husi ADN.IP, Diretóra Diresaun Nasionál Patrimóniu, Lojístika, no Infraestrutura (DNPLI), no reprezentante kompañia sira ne’ebé sei envolve iha projetu sira.

Governu iha nafatin kompromisu atu garante katak infraestrutura desportiva Timor-Leste nian kumpre padraun internasionál sira, hodi apoia organiza susesu ba Jogu CPLP 2025 no dezenvolvimentu ba tempu naruk ba desportu iha nasaun ne’e.

#MediaMjdak