Dili, 16 de Maiu de 2025 – Sua Exelénsia Nelyo Isaac Sarmento, Ministru Juventude, Desportu, Arte no Kultura (MJDAK), hala'o vizita espesiál ba instalasaun foun no furak iha Kampu Akademia Futebol Becora, iha Dili.

Objetivu husi vizita ne'e atu avalia fasilidade desportiva moderna ne'ebé foin kompleta husi Ajénsia Kooperasaun Internasionál Korea (KOICA). Ekipa MJDAK ne'ebé akompaña Ministru inklui Xefi Gabineti, Egas Barros Guterres Godinho, Diretora Jerál Servisu Korporativu, Isabel Adalziza Fátima Rodrigues Ferreira, Diretór Nasionál Patrimóniu, Lojístika no Infraestrutura, Abel de Jesus, no kargu xefia sira seluk iha DNPLI. Sira simu husi Sr. Sunghwan Jang, reprezentante KOICA iha Timor-Leste.

Durante inspesaun, Ministru Nélio Isaac Sarmento (NIS) hateten katak manutensaun no operasaun di'ak ba fasilidade sira-ne'e importante tebes.

"Vizita ohin loron nian fó dalan ba ita atu haree rasik fasilidade desportiva sira ne'ebé KOICA konstrui ona, no subliña ba funsionáriu sira katak manutensaun ne'ebé di'ak importante tebes. Foku liu atu asegura katak bee moos funsiona ho di'ak iha edifísiu laran tomak," dehan Ministru NIS ho entuziasmu.

Inspesaun ida-ne'e hatudu kompromisu Governu nian atu kontinua dezenvolve infraestrutura desportiva ho kualidade aas iha nivel nasionál, hodi apoia formasaun atleta no anima juventude ativa iha Timor-Leste.

Akademia Futebol Becora reprezenta investimentu boot ida iha desportu Timor-Leste nian no fiar katak sei sai fatin importante ida hodi dezenvolve talentu futeból iha ita-nia nasaun.

 #MídiaMJDAK