Dili, 01 Fevereiru 2025 – Asosiasaun Futebol Munisipiu Manufahi manán títulu kampiaun Kopa Futebol Juvenil U15 2024, ho skore 3-2 kontra Asosiasaun Futebol Juvenil Baucau, iha final ne'ebé realiza  iha Estádio Munisipal Dili. Eventu ne'e ho tema "Transforma Futebol Sai Orgullu Nasional", hatudu poténsia jogadór juvenil sira nian no presiza atensaun husi governu no sosiedade. 

Prezidente Federasaun Futebol Timor-Leste (FFTL), Nilton Telmo Gusmao, hateten katak kompetisaun ne'e sai motivasaun ida ba sosiedade tomak, no presiza investimentu kontínuu husi governu, liuliu husi Ministériu Juventude Desportu, Arte no Kultura (MJDAK). "Jogadór sira ne'e presiza atensaun no apoiu hodi sai jogadór kualifikadu no atrai interese husi klubu sira," dehan Gusmao. 

Kompetisaun ne'e mos hatudu katak jogadór di'ak sira mai husi asosiasaun futebol juvenil iha munisípiu sira. Ho ida ne'e, FFTL no MJDAK presiza hala'o esforsu hamutuk hodi dezenvolve talentu sira ne'e. 

Premio ba manan nain :

1. Manufahi (Kampiaun): $3,500.00 

2. Baucau (Runner-Up): $2,650.00 

3. RAEOA (Terseiru Klasifikasaun): $2,000.00 

Final ne'e hetan partisipasaun husi figura importante sira hanesan Diretór Jerál Desportu MJDAK, Joao Rodriques, Adjuntu FFTL, Diretór Jerál Arbitragem Timor-Leste, no prezidente Asosiasaun Futebol Munisípiu sira. 

Eventu ne'e sai oportunidade ida atu hadiak futuru futebol nasionál, ho apelu ba governu no sosiedade atu kontinua investe ba jogadór juvenil sira.

#MédiaMjdak