Dili, 06 Janeiru 2025 – Ministério Juventude, Desportu, Arte no Kultura (MJDAK), hamutuk ho Sekretaria Estadu Arte no Kultura (SEAK), realiza serimónia isar bandeira hamutuk iha fulan dahuluk tinan 2025 nian, iha resintu MJDAK Lecidere, Dili. Atividade ida ne’e marka ida hahú ba tinan foun ho esperansa no determinasaun.

Ministru Nelyo Isaac Sarmento (NIS) apela ba funsionáriu sira hotu-hotu atu foti responsábilidade no servisu hamutuk ho espírito kolaborasaun. Ministru NIS hatete, “Tinan ida ne’e ita tenke koko atu halo refleksaun ba buat isin todan no simu tinan foun ida ne’e hanesan oportunidade atu servisu makas ba povu no nasaun.”

Ho programa jogu CPLP 2025 nian iha horizonte, Ministru NIS subliña importánsia servisu maka’as no efisiente. Tanba Timor-Leste hanesan nasaun na’in ba jogu CPLP, ita iha obrigasaun hodi hala’o susesu buat ida ne’e. Ministru husu diretór-jenerál sira no ekipa hodi servisu hamutuk iha diresaun ne’ebe klaru, nune’e bele garante susesu ba jogu CPLP no atividade sira seluk ne’ebe relasiona, hanesan reuniaun joven kriadores no promosaun arte.

Ministru mos apela atu funsionáriu kazuál no efetivu sira fó kontribuisaun ida ne’ebe importante iha serimónia no programa sira. Ministru NIS subliña ne’ebe, “Ita servisu hamutuk atu hametin unidade iha fin do ano no sai di’ak liu tan hanesan família ida.”

Serimónia isar bandeira ne’e maka sai plataforma refleksaun hodi hahú servisu maka’as ba tinan foun. Ministru husu funsionáriu sira atu muda hanoin no abordajen atu aumenta efikásia no kualidade servisu ba programa sira iha tinan 2025.

Serimónia ne’e hetan partisipasaun direta husi Sekretáriu Estadu Arte no Kultura (SEAK), Jorge Soares Cristovão, no funsionáriu sira husi MJDAK ho SEAK. Prezidente KRAM, diretór-jenerál, no xefi departamentu sira mos marka prezensa, hanesan sinal klaru unidade no determinasaun ba susesu programas nasional ne’ebe sei la’o iha tinan ida ne’e.

Tanba jogu CPLP la’ós de’it atividade desportiva, maibé mos inklui promosaun arte no kriatividade. Ministru NIS husu ba funsionáriu hotu hodi servisu maka’as hosi ohin fulan Janeiru to’o fulan Juñu atu nune’e bele garante programa desportu CPLP 2025 ho di’ak.

MJDAK hakat ho motivasaun foun atu servisu maka’as, hanesan forma hodi kontribui ba susesu Timor-Leste iha arena CPLP no promosaun juventude, arte, no kultura.

#MediaMjdac