Dili, 24 Fevereiru 2024 – Komisaun Organizadora (KO) Jogu Komunidade Países Lian Portugés (CPLP), ne’ebé lidera husi Sua Exelénsia Sekretáriu Estadu Arte no Kultura (SEAK), Jorge Soares Cristóvão, hala’o enkontru ho delegasaun husi Komisaun Téknika (CTA), Antônio Manuel da Luz (Angola), Jorge César Vilela de Carvalho (Portugal), Carla Alexandra Bastos da Silva (Portugal), no Paulo Jorge Coimbra Fontes (Portugal), akompaña hosi reprezentante hosi liña ministeriál sira. Enkontru ne’e hala’o iha Salaun Magna Ministériu Juventude Desportu Arte, no Kultura (MJDAK) iha Lecidere, Dili, Timor-Leste. Iha enkontru ne’e, Sekretáriu Estadu Jorge Soares Cristóvão, ne’ebé hala’o kna’ar mós nu’udar Koordenadór Jerál ba Jogu CPLP, afirma katak delegasaun CTA halo vizita ba Timor-Leste hodi avalia preparasaun nasaun nian nu’udar uma-na’in ba Jogu CPLP ne’ebé sei mai.
“Ohin, delegasaun husi Komisaun Tékniku Akompañamentu (CTA) ba Jogu CPLP nian to’o hodi halo avaliasaun ba ita-nia prontidaun hodi sai uma-na’in ba eventu ne’e. Ami aprezenta vizaun jerál bazeia ba rezolusaun governu nian ne’ebé dezigna Timor-Leste nu’udar uma-na’in ba edisaun 2020 nian maibé la realiza tanba covid. Enkontru ne’e foka liu ba ita-nia koordenasaun no preparasaun téknika iha kolaborasaun ho federasaun sira, inklui infraestrutura desportu. Delegasaun CTA mós hato’o rekomendasaun xave, partikularmente kona-ba Atletizmu no Xadrez, subliña importánsia husi ekipamentu eletróniku no rekursu umanu hodi apoia ezijénsia téknika CTA nian”, esplika Jorge Soares Cristóvão.
Sekretáriu Estadu destaka liután katak CTA rekoñese Timor-Leste nia progresu signifikativu iha preparasaun ba Jogu sira. Maibé, delegasaun ne'e mós hato'o preokupasaun sira kona-ba arranju lojístiku sira hodi akomoda atleta no ofisiál sira maizumenus na'in 800 ne'ebé to'o iha nasaun.
Iha loron daruak, delegasaun CTA sei halo vizita kortezia ba Ministru Interiór, Ministru Saúde, no Ministru Transporte no Telekomunikasaun. Sira mós sei hala'o avaliasaun iha fatin ba fatin desportu sira ne'ebé maka dezignadu ba kompetisaun.
Enkontru ne’e hetan partisipasaun husi ofisiál altu nivel balun, inklui Diretora Jerál Servisu Korporativu (DJSK), Isabel Adalziza Fátima Rodrigues Ferreira; Diretór Jerál Desportu (DJD), João M. Rodrigues; Diretór Jerál Juventude (DJJ), David Tomás de Deus; no Diretór Jerál SEAK, Gór Paulino. Marka prezensa mós reprezentante husi ministériu oioin, inklui MTC, MNEC, ME, MPIE, MCI, MS, MI, MESCC, no SEKOMS, hamutuk ho federasaun desportu nasionál sira hanesan FFTL, CPNTL, FTA, FVTL, FNBTL, FEKATIL, Federasaun Tenis, no Federasaun Xadrez.
Oráriu Vizita husi Delegasaun CTA CPLP
Iha loron 22 no 23 Fevereiru, membru CTA ba Jogu CPLP to’o iha Timor-Leste. Iha loron 24 Fevereiru, sira partisipa iha enkontru traballu ida ho Komité Organizadora Lokál no Unidade Téknika Ministeriál, ne’ebé lidera husi Sekretáriu Estadu Arte no Kultura. Delegasaun ne’e mós hala’o vizita ba fatin ba instalasaun desportu no otél sira.
Iha loron 25 Fevereiru, delegasaun CTA hala’o enkontru ho Ministériu Saúde no Ministériu Interior, ne’ebé inklui diskusaun ho Komandante PNTL, Xefe Imigrasaun, no Sekretáriu Estadu Protesaun Sivíl. Sira mós hasoru malu ho Ministériu Transporte no Komunikasaun. Iha loron hanesan, Xefe Misaun Desportu CPLP no Komisaun Desportu Konferénsia Ministru Juventude no Desportu (Diretór-Jerál sira) to’o iha Timor-Leste.
Nu’udar parte ida husi prosesu preparasaun, ajenda enkontru ida iha Ministériu Juventude, Desportu, Arte, no Kultura (MJDAK) hodi finaliza detallu ba enkontru Komisaun Desportu no Semináriu ba Xefe Misaun.
Iha loron 26 fulan Fevereiru, delegasaun CTA, hamutuk ho Xefe Misaun no membru Komisaun Desportu CPLP, halo vizita ba otél sira no halo inspesaun ba infraestrutura xave desportu sira iha Dili, inklui kampu voleibol, Estádiu Munisipál Dili, Jináziu Munisipál Dili, Jináziu Desportu Dili, kampu ténis, Kampu Desportu.
Iha loron 27 Fevereiru, hala’o semináriu ida ba Xefe Misaun, tuir fali ho enkontru ida ho MJDAK no vizita kortezia ida ba Primeiru-Ministru Xanana Gusmão. Loron ne’e konklui ho eventu interasaun kulturál no sosiál.
Iha loron 28 Fevereiru, Xefe Misaun Jogu CPLP no Komisaun Desportu CPLP aranka ba ida-idak nia rain, tuir mai membru CTA sira iha loron tuir mai.
Vizita ida ne’e marka pasu importante ida atu garante Timor-Leste nia prontidaun hodi sai uma-na’in ho susesu ba Jogu CPLP no fornese ambiente ida ne’ebé organizadu ho di’ak no akollidu ba nasaun partisipante sira hotu.
#MediaMJDAK
