DILI, 30 Maiu 2025 – Ministériu Juventude, Desportu, Arte no Kultura (MJDAK), ne'ebé lidera husi Sua Exelénsia Ministru Nelyo Isaac Sarmento, hanesan mós Prezidente Komisaun Organizadora ba XII Jogos Desportivas Comunidade dos Países de Língua Portuguesa (CPLP) 2025, ohin selebra akordu servisu hamutuk ho Banco Nacional de Comércio de Timor-Leste, S.A. (BNCTL). Seremónia asinatúra Protokolu Kooperasaun ne'e hala'o iha Salaun Magna MJDAK, Lecidere, Díli.

Akordu ne'e formaliza BNCTL nia pozisaun nu'udar Patrosinadór Ofisiál no Patrosinadór Platina ba XII Jogos Desportivas CPLP 2025, XVI Konferénsia Ministru Desportu no Juventude CPLP, no Fórum Juventude CPLP nian, ne'ebé sei hala'o entre loron 17 no 27 Jullu 2025, iha Díli.

Iha konferénsia imprensa, Ministru Nelyo Isaac Sarmento (NIS) agradese ba jornalista sira no realsa importánsia parseria ida-ne'e. "Ohin, loron 30 Maiu 2025, MJDAK asina akordu kooperasaun ho Banku Nasionál Comérsiu Timor-Leste (BNCTL), atu fó apoiu ba XII Jogos Desportivas CPLP 2025. Ida-ne'e hanesan meius ida ne'ebé apoia didi'ak Governu no Estadu atu fó susesu ba jogu ne'e rasik," Ministru Sarmento hateten. Nia mós subliña katak ida-ne'e hatudu instituisaun privadu sira-nia prontidaun atu partisipa ativu iha eventu nasionál no internasionál sira.

Atu konkretiza apoiu, BNCTL sei fó kontribuisaun signifikativa ba eventu ne'e, inklui:Fasilidade Transporte: Atu uza ba delegasaun no komisaun sira ne'ebé mai husi Paízes CPLP, Produsaun Kamizola/Uniforme: Ba Komisaun Organizadora durante Jogos Desportivas CPLP, Apoiu Publisidade: Inklui produsaun baliho (bilboard) no materiál audiovizuál relevante ho jogu.

Ministru Sarmento mós hateten katak apoiu BNCTL nian ida-ne'e reflete forsa kuandu instituisaun Timoroan sira, tantu privadu no públiku, servisu hamutuk. "Ida-ne'e mós loke posibilidade ba eventu sira seluk tan atu BNCTL bele partisipa hodi fó susesu ba kualker atividade ne'ebé akontese iha ita-nia rai," nia dehan.

Iha fatin hanesan, Prezidente Komité Ezekutivu BNCTL, Marcelo da Cruz Carvalho, hato'o ninia orgullu ba parseria ida-ne'e. "Parseria ne'e reprezenta pasu importante ida iha mobilizasaun rekursu nasionál sira ba eventu ida ho importánsia internasionál, ne'ebé sei koloka Timor-Leste iha sentru desportu no juventude nian iha CPLP," Marcelo da Cruz Carvalho afirma.

Nia mós realsa BNCTL nia kompromisu atu dezenvolve juventude nia talentu, inklui planu atu kontaktu atleta profisionál sira no loke konta bankária  iha BNCTL. Nu'udar Patrosinadór Platina, BNCTL sei hetan vizibilidade marka nian iha materiál promosionál no espasu fíziku no dijitál sira ne'ebé asosiadu ho eventu, inklui asesu ba billete desportu no konvite ba serimónia ofisiál sira.

Kolaborasaun entre MJDAK no BNCTL reforsa envolvimentu setór finanseiru iha dezenvolvimentu desportu no iha reforsu kooperasaun rejionál, liuliu iha kontestu Komunidade País sira Lian Portugés.

#MídiaMJDAK