Díli, 21 Maiu 2025 – Ekipa futeból selesaun nasionál Timor-Leste ne’ebé prepara atu partisipa iha XII Jogos Desportivos da CPLP 2025 hahú ona jogu avaliasaun preparativu. Sekretáriu Estadu Arte no Kultura (SEAK), Sua Exelénsia Jorge Soares Cristóvão, nu’udar Koordenadór Jerál ba Jogos CPLP 2025, marka prezensa hodi observa jogu entre ekipa selesaun nasionál no klube A.D. SLB, ne’ebé hala’o iha Kampu Futeból Becora, Díli.

Jogu ida ne’e nudar prosesu avaliasaun inisiál atu haree prontidaun no kapasidade jogadór sira ne’ebé sei representa Timor-Leste iha kompetisaun CPLP. Husi jogadór 22 to’o 23 sira ne’ebé envolvidu, ekipamentu téniku sei hili jogadór final rua atu kompleta lista ofisiál. Ida ne’e fó oportunidade ba treinadór sira atu avalia jogadór sira nia performansa individual no koletivu.

Jogu ida ne’e sei kontinua ho série jogu seluk kontra klube sira ne’ebé agora kompite iha Liga Timorense. Prosesu ne’e nudar mekanismu atu fó imajen klaru kona-ba nivel preparasaun ekipa selesaun.

Treinadór prinsipál, Sr. Kim, sei halo diskusaun ho ekipamentu téniku atu halo ajustamentu ba estratéjia no tátika jogu. Jogadór barak mak mai husi munisípiu oioin, no maioria mak partisipa tiha ona iha seleksaun Jogos Eskolár Sub-15 to’o Sub-17 ne’ebé organiza husi MJDAK ho kolaborasaun FFTL.

Iha paralelo, atleta sira hosi modalida deportivu neen – hanesan Futeból, Atletizmu, Voleiból Praia, Basketebol 3x3, Karaté, Taekwondo, Xadrez, Ténis no Atletizmu Paralímpiku – halo hela akampamentu treinu iha Otél Ramelau.

Relativu ba infraestrutura ba Jogos CPLP, observasaun mak hatudu katak prosesu konstrusaun atinji ona kuaze 70% kompletasaun. Baseia ba estimativa, kontratór sira hein atu entrega Edifísiu Desportu Díli (GDD), Estádiu Díli no Kampu Voleiból Praia iha finál fulan Juñu.

Iha jogu ohin, klube A.D. SLB manan ekipa selesaun nasionál ho eskoru 2–1. Rezultadu ne’e sei sai referénsia importante ba ekipa téniku atu avalia tátika jogu, identifika forsa no área ne’ebé presiza fortalese antes ba kompetisaun ofisiál.

#MídiaMJDAK