Dili, 16 de Maiu de 2025 – Sua Exelénsia Nelyo Isaac Sarmento, Ministru Juventude, Desportu, Arte no Kultura (MJDAK), partisipa iha Serimónia Impozisaun Deviza Tranzitóriu no Promosaun Antiguidade ba membru Polísia Nasionál Timor-Leste (PNTL) na’in 604 husi Unidade Espesial Polísia (UEP), iha Bairu Pite, Díli.

Serimónia importante ne'e marka promosaun ne'ebé bazeia ba kritériu tranzitóriu no antiguidade, hodi rekoñese kontribuisaun no sakrifísiu membru PNTL sira-nian ne’ebé kontinua kontribui ho servisu protesaun seguransa no dame ba povu no nasaun.

Prezensa Ministru MJDAK nian iha serimónia ne'e simboliza apoiu Governu nian ba membru Forsa Seguransa, liuliu juventude sira ne’ebé hahú karreira iha PNTL ho esperansa atu kontinua servisu ho disiplina, konfiansa no profesionalizmu.

“Ami hotu agradese ba dedikasaun no servisu di'ak ne'ebé membru PNTL sira hala’o ona iha tinan hirak nia laran, atu kontinua garante estabilidade iha sosiedade timoroan,” hateten Ministru Nelyo Isaac.

Serimónia ne’e mós fó oportunidade ba Ministru Interior, Francisco da Costa Guterres, atu parabéns ba Komandu Jerál PNTL no membru sira hotu ne’ebé simu diviza foun, ho mensajen klaru atu kontinua serbí ho dignidade no lideransa ba futuru.

“Ita-boot sira tau imi-nia vida iha risku, dezempeña papél importante ba estadu no dezenvolvimentu Timor-Leste,” hateten Ministru Interior.

Nia hateten tan, Governu sei kontinua fó prioridade ba formasaun no reestruturasaun organizasionál atu aumenta kapasidade lideransa ba membru promovidu sira, tuir estatutu no lei orgánika PNTL nian.

Komandante Jerál PNTL, Komisáriu Jerál Henrique da Costa, subliña katak promosaun ne’e implika la’ós kontente de’it, maibé aumenta responsabilidade atu servisu ho kualidade no étika profisionál.

Serimónia importante ne’e halibur lideransa governamentál no seguransa nian, inklui partisipasaun husi Ministru Interior, Komandante Jerál PNTL, Segundu Komandante Jerál, Deputadu Parlamentár, estrutura PNTL nian, ekipa promosaun, no família membru sira-nian.

Parabéns ba membru PNTL hotu ne'ebé hetan promosaun! Ita-boot sira-nia esforsu no sakrifísiu importante tebes ba dame no estabilidade iha Timor-Leste.

#MídiaMJDAK