DÍLI, 23 Maiu 2025 – Ministru Juventude, Desportu, Arte no Kultura (MJDAK), Sua Excelência Nelyo Isaac Sarmento(NIS), halo enkontru ohin ho Prezidente Komisaun Organizadora Jornada Juventude Nasionál, Padre Indra Francisco Nascimento, atu koordena preparasaun ba evento relijiozu foinsa’e sira nian ne’ebé sei realiza iha Munisípiu Bobonaru, entre loron 25 to’o 29 Agostu 2025.

Iha enkontru ida-ne’e, Ministru Nelyo Sarmento subliña preokupasaun governu kona-ba influénsia negativa husi média sosiál no teknologiia avansada hanesan Intelijénsia Artifisiál (AI) ba moris no mentálidade juventude iha era globál.

"Agora ne’e, jovem barak hetan informasaun husi média sosiál, maibé informasaun mak sai, duni laos hotu loos. Ho AI, ema bele modifika kontéudu no halo dizinformasaun, ne’ebé bele halo moras mentál, moras atitude, no loke dalan ba problema sosiál," hateten Ministru NIS, nune’e nia apela atu uza teknologiia ho matenek.

Ministru mós foti referénsia mensajen Papa Leão XIV kona-ba AI, ne’ebé fó matadalan ba Igreja atu halo refleksaun profundu kona-ba impaktu moral no sosial husi teknologiia foun.

Husi parte Komisaun Organizadora, Padre Indra Francisco Nascimento informa katak organizasaun iha preparasaun final ba Jornada Juventude Nasionál, inklui mós vizita krús internasionál husi Koreia Súl ne’ebé sei akonpaña prosesu formativu iha Timor-Leste entre loron 23 to’o 30 Agostu 2025.

Amu Indra Nascimento husu disponibilidade Ministru MJDAK atu fó palestra iha Parókia Bobonaru ba joven sira, no mós atu fó audiénsia spesífiku ba grupo juventude ne’ebé komesa ona prosesu formasaun espiritual iha fulan Maiu.

Amu Indra mós hato’o agradesimento ba MJDAK nia kontribuisaun atu sustenta juventude Timoroan ne’ebé sei partisipa iha peregrinasaun Jubileu Foinsae, nu’udar parte importante ba preparasaun espiritual no edukativu.

#MídiaMJDAK