DILI, 12 Jullu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, hamutuk ho Sekretáriu Estadu Arte no Kultura (SEAK), Jorge Soares Cristovão, ohin hala’o reuniaun urjente ida ho Komandu Jerál PNTL. Reuniaun ne’e ho objetivu prinsipal atu koordena no hametin planu seguransa ba XII Jogu Desportiva CPLP 2025, ne’ebé Timor-Leste sei sai nu’udar uma na’in. Enkontru ne’e realiza iha Salaun Magna MJDAK, Lecidere, Díli.

Iha reuniaun ne’e, Ministru Nelyo Isaac Sarmento fó hanoin ba parte seguransa atu bele asegura kontinjente sira hotu ne’ebé mai husi país membru CPLP sira. Ministru subliña importánsia husi seguransa ne’ebé másimu hodi garante susesu ba eventu internasionál ne’e. “Tanba nasaun Timor-Leste mak sai uma na’in ba Jogu CPLP refere, entaun mai ita hamutuk atu fó seguransa di’ak liu tan hodi nune’e bele la’o ho susesu,” afirma Ministru Nelyo Isaac Sarmento.

Husi parte PNTL, Segundu Komandante Jerál PNTL, Sua Exelénsia Pedro Belo, aprezenta mapamentu detalla kona-ba planu seguransa ne’ebé sei implementa. Mapamentu ne’e inklui estratéjia sira atu asegura kontinjente sira hotu ne’ebé mai husi país membru CPLP no sei tuir kompetisaun iha Jogu CPLP 2025 iha Timor-Leste.

Reuniaun ne’e hetan partisipasaun másimu husi Komandante Tátiku, Komandante Operasaun, Komandante Munisípiu Díli, Xefe Gabinete Komandu Jerál PNTL, Diretór Jerál Desportu MJDAK, Prezidente KRAM, no mós Asesór Tékniku sira.

Koordenasaun entre MJDAK no PNTL ne’e hatudu kompromisu Governu nian atu garante ambiente ne’ebé seguru no hakmatek ba partisipante no vizitante sira durante Jogu CPLP, hodi reforsa imajen Timor-Leste nu’udar país ida ho paz no estabilidade.

#MídiaMJDAK