Díli, 3 Fevereiru 2025 – Ministériu Juventude, Desportu, Arte no Kultura (MJDAK), lideradu husi Diretora Jerál Servisu Kooperativu, Isabel Adalziza Fátima Rodrigues Ferreira, hamutuk ho Diretór no asesór sira, hala’o reuniaun ho delegasaun husi Embaixada Republika Indonézia (KBRI) atu diskute programa bolsu estudu ba funsionáriu MJDAK. Enkontru ne’e hala’o iha Salaun Magna MJDAK, Lecidere, Díli.

Iha diskusaun ne’e, Diretora Jerál Isabel Adalziza F. Rodrigues hateten katak MJDAK agradese tebes ba oportunidade bolsu estudu ida ne’e, ne’ebé sei fó benefísiu ba funsionáriu sira no fortalese kooperasaun entre Timor-Leste no Indonézia.

“Ami agradese tebes ba KBRI nia suporta no kooperasaun ne’ebé kontinua. Bolsu estudu ida ne’e sai hanesan lasu amizade ida ne’ebé di’ak tebes, ne’ebé sei ajuda ita nia funsionáriu sira atu dezenvolve kapasidade no kontribui ba dezenvolvimentu nasional.” dehan DJ Isabel

Representante Embaixada Republika Indonézia, Prof. Dr. Phil. Ikhafan Haris M.Sc, esplika katak programa bolsu estudu ne’e sei kobre área desportu, inklui kursu Basharelatu, Mestradu, no Doutoramentu.

“Programa ida ne’e sai hanesan parte husi ami nia kompromisu atu suporta dezenvolvimentu rekursu umanu iha Timor-Leste. Ami konsulta ho ministériu relevante sira, inklui MJDAK, atu asegura katak bolsu estudu sira ne’e responde ba nesesidade no prioridade nasional.” dehan Prof. Ikhafan.

Reuniaun ne’e marka pasu importante ida ba fortalese relasaun bilateral entre Timor-Leste no Indonézia, liuliu iha área edukasaun no dezenvolvimentu kapasidade.

Diskusaun ne’e mós partisipadu husi reprezentante Departamentu Edukasaun no Formasaun MJDAK no ekipa téknika husi KBRI.

#MédiaMjdak