Dili, 10 Fevereiru 2025 – Komisaun Organizadora Jogu Komunidade Koa’lia Lian Portugês (CPLP) hala’o diskusaun téknika iha Salaun Magna MJDAK, Lecidere, Dili. Reunião ne’e lidera husi Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), hanesan Prezidenti Komisaun Organizadora, hamutuk ho Sua Exelénsia Sekretáriu Estadu Arte no Kultura (SEAK), Jorge Soares Cristovão, hanesan Kordenadór Jerál ba Jogu CPLP. Diskusaun ne’e mós akompaña husi Diretór Jerál na’in tolu no lideransa relevante husi MJDAK no SEAK.

Tuir Ministru Nelyo Isaac Sarmento, diskusaun téknika ne’e fó prioridade ba preparasaun ekipa nasionál ne’ebé sei partisipa iha Jogu CPLP.

"Ohin ita iha reiuniaun ida hodi haree asuntu importante sira. Primeiru, ita prepara ekipa nasionál ba modalidade sira ne’ebé sei partisipa, inklui fasilidade treinu. Segundu, ita haree kada komisaun nia responsabilidade ba organizasaun jogu. Tanba CPLP Games la’ós de’it futeból, maibé iha modalidade seluk ne’ebé fó atensaun hanesan parte organizasaun," hatete Ministru Nelyo.

Alén de preparasaun ekipa, diskute mós rekrutamentu voluntáriu sira, inklui definisaun orsamentu atu koordena ho Ministériu Finansas. Objetivu prinsipal maka atu garante preparasaun ne’ebé efetivu no hatudu organizasaun profesonál ba Jogu CPLP 2025.

Iha diskusaun ne’e, partisipa mós Diretór Jerál Servisu Korporativu (DJSK), Diretór Jerál Juventude (DJJ), Diretór Jerál Desportu (DJD), Diretór Jerál Arte no Kultura, Xefi Gabineti, Diretór Nasionál sira husi MJDAK no SEAK, hamutuk ho Xefi Departamentu sira, asesór no staff relevante.